Den cuadro di intercambio y colaboracion riba e tereno di cuido pa persona cu limitacion mental y otro trastornonan, recientemente representantenan di Departamento di Salud Publico y Ambiente Feliz a haci un bishita di 4 dia na De Stichting voor Gehandicapten- en Revalidatiezorg (de SGR-Groep).

E delegacion di Aruba a haya rondleiding y informacion di Fundacion Verriet (cu ta ofrece vivienda y pasadia na casi 500 persona cu un limitacion), centro Mia Bremmers, Revalidatiecentrum, Curaçao Orthotics & prosthetics; tur ta cay bou di de SGR-Groep. Tambe a haci bishita na Clinica Capriles y Fundacion Birgen di Rosario cu ta traha hunto cu de SGR-Groep riba e tereno di revalidatiezorg. De Directie Volksgezondheid tambe a logra sinta cu SVB y e Ministerie di gezondheid, milieu y natuur na Curaçao tocante e maneho di revalidatiezorg na Curaçao.

Meta di e bishita aki tawata pa tuma nota di e forma con Fundacion Verriet cu ta cay bou di De SGR-Groep ta traha y con e cuido ta structura pa e grupo di personanan cu diferente limitacion y trastorno. Y alabes pa Directie Volksgezondheid por haya mas informacion di e maneho di personanan cu pa diferente motibo mester di guia di rehabilitacion pa por funciona atrobe den comunidad na Curaçao.

Na Aruba tin hopi peticion pa pasadia of cuido residencial pa esnan cu tin descapacidad mental y otro trastornonan compleho. A pesar cu tin diferente fundacion y organisacion trahando riba esaki. Ta sinti cu tin espacio pa mehoracion y structuracion pa por brinda miho calidad di cuido y guia na e grupo aki.

Directie Volksgezondheid Aruba, den colaboracion cu otro fundacion/organisacion manera Ambiente Feliz, Stichting voor Verstandelijk Gehandicapten Aruba, Stichting Hunto, Respaldo, Ministerie van Justitie y Sociale Zaken y Directie Sociale Zaken, a uni forsa pa inventarisa kico tur ta necesario na Aruba pa por realisa un cuido specialisa asina pa personanan cu diferente limitacion y trastorno. E intencion ta pa amplia e colaboracion entre Aruba y Curaçao ariba e tereno di gehandicaptenzorg y tambe uni man cu otro isla den Caribe ariba e tereno di derecho y inclusion pa persona cu un limitacion.

 

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 522-4200 of e-mail nos na servicio@dvg.aw.