Dutch Caribbean Cooperation of Airports (DCCA), cu ta representa seis aeropuerto den Caribe dentro di Reino Hulandes (Aruba, Boneiro, Corsou, Saba, Sint Maarten y Sint Eustatius), tin e placer di anuncia nan prome encuesta di biahe di e tipo aki implementa durante e lunanan di zomer pa tur e islanan cu ta miembro di DCCA. A elabora e encuesta aki cuidadosamente pa descubri informacion valioso y pa distingui e patronchinan di biahe entre e islanan di Caribe Hulandes, cu e meta pa mehora e accesibilidad y eficiencia di e biahenan entre e islanan pa e localnan.
E industria di biahe y e aerolineanan ta den un evolucion continuo y DCCA ta reconoce e importancia di mantene na altura di e cambionan aki. A traves di e encuesta DCCA ta en busca di dato crucial cu lo permiti e islanan y e aeropuertonan di Caribe Hulandes pa tuma desicion basa riba informacion, impulsa innovacion y logra un exito sostenibel.
Un “media tour” exitoso a destaca e importancia di e encuesta
Recientemente, e representantenan di DCCA di Aruba y Corsou a termina cu un media tour exitoso na Corsou p’asina promove e encuesta entre e residentenan di e isla. E media tour aki a inclui bishita na diferente plataforma destaca manera “Mainta” di TV Direct, Ruvette Dirksz na Radio Direct y “Moru Bondia” na TeleCuraçao.
Durante nan bishita, e representantenan di DCCA a enfatisa riba importancia di e encuesta pa e comunidad local. Lo presenta e resultadonan di e encuesta durante e siguiente conferencia di DCCA cu lo tuma luga na Corsou den luna di november.
Representando Aruba tabata t’ey presente Jo-Anne Meaux-Arends, kende ta Business Development Executive na Aruba Airport Authority y Joanne Christiaans kende ta e Program Manager di DCCA. Di otro banda, Corsou tabata representa pa Peggy Croes, Senior Vice-President Aviation Market Development.
Un invitacion pa tur Arubiano participa
DCCA ta invita comunidad di Aruba pa participa activamente na e encuesta historico aki. Bo aporte ta importante pa asina conoce e perspectivanan cu lo tin un rol importante den e proceso general di aviacion den e region. E encuesta ta disponibel online riba: http://s.alchemer.com/s3/AUADCCA
Na momento cu termina cu e encuesta e participantenan tin chens di participa den un sorteo pa gana un “gift card” balora na 400 dollar.
Tocante DCCA
E Dutch Caribbean Cooperation of Airports (DCCA) ta un cooperacion entre e seis aeropuertonan di Caribe denter di Reino Hulandes. E obhetivo di DCCA ta pa mehora e calidad general di cada aeropuerto individual pa medio di facilita asistencia mutuo y intercambio eficiente di informacion, transferencia di conocemento y intercambio di experiencia cu e obhetivo di logra economia di escala. DCCA tin como obhetivo pa presenta diferente opcion di transporte aereo alternativo cu enfoke riba futuro, p’asina mehora e conexion entre e islanan di Caribe Hulandes.
