Ayera mediante un comunicado di prensa, Dushi Carnival Group a expresa nan decepcion pa e comentarionan di SMAC, den cual a bisa cu DCG no tabatin nan papelnan na ordo, expresando cu e grupo “a cumpli cu tur exigencia.”
“A pesar di tur contratiempo, DUSHI a sa di pone un tremendo ambiente riba caminda. DUSHI a luci totalmente cu su outfit colorido cu un biaha mas a haci un diferencia durante anochi”, e grupo a indica. “Nos kier gradici nos DUSHI people pa nan pasenshi pa e tardansa cu a surgi. Boso pasenshi, animo y energia a haci cu, a pesar di tur cos, nos tabata sa di pone un dushi ambiente riba caminda. Ta pa boso nos ta hacie.”
Pa informa nan participantenan, DCG a comparti loke nan a bisa ta pruebanan cu ta demostra cu e grupo a cumpli cu tur exigencia. “Nos trailer como tambe nos bar a cumpli cu tur rekisito pa garantisa siguridad di nos participantenan pa cual motibo a haya e keuring tambe pa por subi caminda. Pues locual cu a pasa tabata fuera di nos alcance. Esey ta e motibo di e tardansa. Pero asina mes di tur skina a yega ayudo. Pa esaki nos ta sumamente agradecido.”
“Nos ta lamenta cu SMAC, sin informa cu lider di grupo di DCG prome, a dicidi di expresa cu DCG no tin niun papel na ordo, comosifuera cu ta DUSHI ta esun cu a causa e tardansa mientras cu den otro gruponan tambe e mesun problema aki a surgi. E pruebanan publica ta demostra cu DCG su trailer y bar ta conta cu e keuringnan necesario. DCG ta cumpli cu reglanan.
“E animo y energia di Dushi People tabata fuerte y grandi suficiente pa pone un grupo bunita yen di ambiente riba caminda.
“Cu esaki nos kier bisa si cu DCG ta asumi su responsabilidad y lo percura pa esaki no ripiti.
Nos palabra di danki na KPA, DOW y tur boluntario cu a coopera pa toch nos 750 participantenan por a subi caminda y engrandece Fakkel na gran forma,” e comunicado a finalisa.
