yakari (1).png

Ki dia hende ta bay stop di “fetish” nos bida Caribense? Ki dia hende lo stop di uza nos manera nan poster children di nan vakantie exotico y cuminsa tene en cuenta e realidad di corupcion y pobresa cu ta penetra hopi parti di Caribe en general sin uza esaki como propaganda? Ban papia.

Bon mi hendenan, despues di un vuelo hopi turbulento caminda e avion tabata shaky, shaky, shaky manera e cantica di Daddy Yankee, mi ta bek na Hulanda cla pa sigui marcha.

En special mi kier papia di pobresa den Caribe. No ta djis asina si, tin algo cu a trigger esaki.  A sucede cu recientemente un rapper Hulandes yama “Lil kleine” (hopi creativo su nomber by the way) a bay Corsou, bishita un bario pober, saca potret cu dos mucha color scur y pone un caption cu a pone mita mundo rabia riba su Instagram. Algo rond di e palabranan, den Hulandes claro:  “Akinan na Sero fortuna, sin duda un di e barionan mas pober y peligroso na Corsou. E dos nan aki sigur no lo caba bon mescos casi tur hende den e bario aki, pero tabata leuk pa conocenan, mi ta desea nan henter mundo”. Amigo, por fabor.
Ta hopi di e hendenan mas briyante di mundo ta bin di barionan pober y peligroso manera bo ta yama nan. Pero esaki ta un otro storia.

Despues di haya su bon backlash di publico pa promove locual ta wordo yama “poverty porn” E rapper a haya su mes ta rectifica locual el a bisa. Aunke claro, segun e, e no tabata kiermen nada malo y su palabranan a wordo saca di contexto. Pero e no ta e unico no, Lil Kleine ta un mas di e miles di hendenan cu ta uza pobresa na destinacionnan “exotico’ pa mehora nan propio imagen publico of pa purba di captura empatia di hende.

Lo unico cu ta haci cu Aruba ta scapa di e trato aki, ta cu na Aruba pobresa ta mas o menos scondi. Cu den nos afan di protege nos imagen y nos bida di turista riba nos mesun isla nos ta sconde e momentonan y e hendenan cu ta pasa den duro. No obstante na esey, nos mester papia di dje si. Pasobra pone klinkers cu asfalt nobo rond di barionan cu antes tabata e imagen di pobresa, no lo elimina pobresa y tanto bal bo verf un cas pafo si bo no ta drecha e dak cu ta haci cu awa ta drenta den e cas ora awa yobe. Aruba, un isla cu tabata conoci pa su hendenan curason grandi y humilde, e isla caminda hende tabata habri nan cas pa turistanan ora hotelnan tabata yen awo ta sconde tras di e beyesa di su cayanan renoba, awo ta publica articulonan di con nos no kier turistanan sin placa bishita nos, awo ta aleha di tur locual algun dia a haci nos autentico. Y aunke nos ta logra di scapa di shonnan manera Lil Kleine, mirando cu nos imagen ta un mas bunita y mas refina, nos no por keda tira klinkers riba nos problemanan social.