(Reuters) – Hefe di Telegram Pavel Durov a bisa diabierna cu e aplicacion di mensahe lo combati critica tocante su moderacion di contenido y kita algun funcion cu a ser abusa pa actividad ilegal.

Durov, ken siman pasa a ser poni bao investigacion formal na Francia en conexion cu e uso di Telegram pa crimennan incluyendo fraude, labamento di placa y comparti imagennan di abuso sexual di mucha, a anuncia e decision den un mensahe na e 12.2 miyon usuario riba e plataforma.

“Mientras cu 99.999& porciento di e usuarionan no tin nada di haber cu crimen, e 0.001% involucra den actividadnan ilicito ta crea un mal imagen pa henter e plataforma, poniendo e interes di nos casi 1 biyon usuario den riesgo,” e negociante Ruso a publica. “Esaki ta e motibo dicon e aña aki nos ta comprometi pa converti moderacion riba Telegram for di un area di critica na un area di elogio.”

Durov no a detaya con Telegram lo logra esaki. Sinembargo el a bisa cu ya caba el a deshabilita upload di media nobo na un herment independiente di blogging “cu aparentemente a ser mal usa pa actornan anonimo.”

Tambe el a kita e funcion tiki usa di ‘People Nearby’ “cual tabatin problema di bot y scammer” y na luga di esaki tabata mustra negoshi verifica y legitimo cerca na e usuarionan.

E cambionan aki ta e prome cu el a anuncia desde cu el a ser deteni na Francia luna pasa y interoga pa 4 ida prome cu el a ser poni bao investigacion formal y laga den libertad bao fiansa.

E caso a resona den henter e industria di tecnologia global, treciendo dilanti pregunta tocante e limite di libertad di expresion online, e politica di plataformanan di rednan social y si nan doño ta legalmente responsabel a comportamento criminal di e usuarionan.

Durov su abogado a bisa cu ta absurdo pa investiga e hefe di Telegram pa crimennan cometi pa otro personanan riba e aplicacion.

Katie Harbath, un ex director di politica publico na Meta, a bisac u “e ta algo bo cu Durov lo cuminsa tuma moderacion di contenido na serio, pero, di mesun manera cu Elon Musk y otro CEO den tecnologia cu ta lidera plataformanan di mensahe, si e ta pensa cu e lo ta simplemente haci algun cambio chikito, e lo haya un sorpresa grandi.”

Telegram tambe a kita lenguahe for di su Frequently Asked Questions (FAQ) bisando cu e no ta procesa rapport di contenido ilegal den combersacion priva pa motibo cu e combersacionnan aki ta protegi. Durov n oa referi na e cambio aki den su mensahe, den cual el a bisa cu Telegram a yega 10 miyon usuario cu ta paga un suscripcion.

Den un publicacion anterior riba diahuebs, Durov a bisa cu Telegram no ta perfecto. “Sinembargo e acusacionnan den rednan social cu Telegram di algun manera ta un paraiso ta absolutamente falso,” el a skirbi. “Nos ta retira miyones di publicacion dañino y canalnan tur dia.”