Consulnan di diferente pais como Brasil, Francia, Haiti, Costa Rica, Peru, Ecuador, Filipina y Republica Dominicana a wordo ricibi pa asesor di minister di Asuntonan di Labor, Glenbert Croes, pa motibo cu tin cierto inkietud cu nan tin di parti di e ciudadanonan di e paisnan aki, cu ta haci bida na Aruba.

Carlos Andre Augusto, consul di Brasil na Aruba y presidente di Asociacion di Cuerpo Consular di Aruba, a expresa ayera mainta cu ciudadanonan di e paisnan aki a duna di conoce nan inkietud cu tin di haci cu medida- y problemanan social cu a surgi a consecuencia di e crisis di Covid-19.

Augusto a menciona cu tin varios problema social, laboral, economico. Tambe un otro topico cu nan a trece dilanti tabata trata di e programa di ayudo FASE. Ademas el a comenta cu e reunion tabata uno fructifero y algun preocupacion a wordo aclaria.

“Cu esaki nos tin condicionnan suficiente na momento cu e personanan di diferente nacionalidad ta yega cerca nan consul pa nos por duna nan un contesta y informacion corecto riba e mesun linea cu Gobierno di Aruba, cu tin cu proceduranan, casonan cu tin relacion cu diferente sector,como ehemplo, DPL, FASE of DIMAS”, Augusto a declara.

Di mesun manera el a laga sa cu tin otro asuntonan cu lo sigui traha den un proximo reunion, pa asina e ciudadanonan di e paisnan aki por haya sa cu consuladonan ta preocupa tambe, igualmente cu Gobierno di Aruba, segun loke Augusto a bisa, pa asina nan por busca un forma di traha uni pa por supera e crisis di Covid-19 lo mas pronto posibel pa tur esnan cu tin mas dificultad.

Tin diferente nivel di dificultad. Por ehemplo, Augusto a expresa cu tin personanan cu na e momentonan aki no tin absolutamente nada y otronan cu no a wordo afecta hopi. “Pero pa cada caso ta medidanan diferente, cada consulado tin diferente caracteristica y inkietud, pero na nivel general, nos tin cu trata tur persona den e mesun linea.”

Den sentido aki, el a afirma cu por ta e caso di un persona cu algun di e nacionalidadnan aki ta casa cu otro nacionalidad, y loke nan no kier ta pa nan tuma diferente manera pa actua. Conhuntamente cu Gobierno di Aruba, nan ta purbando di mantene e mesun procedura pa tur.

E union aki di diferente consulado ta existi desde algun tempo caba, segun loke Augusto a duna di conoce, pero e no ta hopi conoci pa comunidad en general. Tocante Asociacion Cuerpo Consular di Aruba (ACCA) di e cual Augusto ta su presidente, el a declara cu e funcion di e asociacion ta pa uni consuladonan pa diferente topiconan, entre nan, esaki di Covid-19.

Nan ta haci actonan humanitario y ta ofrece comestibel segun Augusto a menciona y esey ta existi for di casi 20 aña caba.

Di loke ta trata e problemanan mas comun, Augusto a declara cu esun mas conoci ta e preocupacion cu ciudadanonan tin relaciona cu nan condicion di trabao. Manera a keda conoci hopi persona a keda sin un situacion laboral stabiel door di e pandemia. Algun di nan ta cobra 60% di nan salario solamente, otronan a cay bao ayudo di FASE.

Tin diferente pregunta riba loke ta trata asuntonan laboral. E miedo di perde trabao ta genera un inkietud social. Esey tabata di e un temanan cu a wordo treci dilanti pa nan tin e informacion corecto por ehemplo, na ki momento FASE ta wordo aplica, con e procedura ta awor cu a cambia e diferente permisonan, personanan cu kier bay back na su pais of esunnan cu kier drenta.

Augusto a bisa cu awor tin problema di diferente pais y algun di nan cu restriccion pa drenta como e test di Covid-19 y cuarentena obligatorio, ceramento di frontera cu otro pais como Brasil y esey ta trece inconveniente pa esunnan cu tin cu bay back na Brasil y e mesun situacion pa personanan di Peru of Ecuador.

Den caso aki tin vuelonan humanitario, nan ta prepara algun forma di ayudo y organisacion den caso cu lo mester sigui cu e vuelonan aki, actua hunto cu Gobierno di Aruba pa cu tur departamento lo ta den mesun nivel pa motibo cu, tin personanan cu no sa na unda nan mester bay, ni informacion precies pa loke nan ta termina den e consulado di nan pais.

Augusto a señala cu ta existi cierto aspectonan cu consulnan no por cumpli, “consulnan tin cierto reglanan di nos paisnan y di nos embahadanan cu tin hurisdiccion riba Aruba pero si tin cierto aspecto cu si nos por yuda”, el a afirma.

Tambe, Augusto a expresa cu nan a papia tocante e topico di DIMAS cu ta cay bao responsabilidad di minister di Husticia Andin Bikker pero pa motibonan di salud e no por tabata presente den reunion aki.

Di e proximo reunion el a sigura cu nan lo conta cu e presencia di prome minister Evelyn Wever-Croes, minister Bikker y minister Glenbert, entre nan lo duna un siguimento di e prome reunion.

Di mesun manera tambe el a splica cu e procesonan cu DPL y DIMAS ta sigui pero di un manera mas slow pa motibo cu algun personanan ta traha for di cas y cu esey tambe ta un di e inkietudnan di algun ciudadano, nan ta informa tocante falta di documentacion y ta ‘pesey e motibo pa e cual e plaso ta mas largo pero cu te awor no lo tin cambio riba esey.

Augusto a conta cu si lo tin algun cambionan nan lo wordo anuncia esey den e proximo reunion pa tur consulado por tin e informacion precies.

A hala un poco atencion cu consul di Venezuela na Aruba no tabata presente den reunion aki, ya cu na Aruba tin un cantidad considerabel di ciudadanonan cu nacionalidad Venezolano, ora a trece dilanti e pregunta di e motibo di ausencia Augusto no a duna un splicacion specifico sino cu nan lo manda tur e informacion cu a wordo papia pa esunnan cu no por tabata presente den reunion e biaha aki.