Riba su agenda di biahe di trabao na Hulanda, Minister Maduro a reuni tambe riba e tereno financiero. Manera nos tur sa Aruba tambe ta bezig pa locual ta trata e leynan di conseho di reino y den nan tin e RAFT, esaki ta pa e supervision financiero cu mester bira un ley di consensus di reino.

E trabaonan ta wordo haci pero den e preparacion pa esaki su implementacion, Minister di Finanzas a tene varios reunion na Hulanda.

Reunion cu Sr. Richard van Zwol, miembro di Conseho di Estado

Minister di Finanzas a trece dilanti den un comunicado di prensa cu a reuni cu Sr. van Zwol, kende ta Staatsraad na Raad van State y alabes e ta miembro di e camara presupuestario hulandes (begrotingskamer). Ta trata un reunion importante buscando e solucionnan, pasobra e supervision financiero cu ta bini y sigur cualkier otro mehoracion financiero pa pais Aruba, lo tin cu conta na un momento tambe cu un begrotingskamer. Durante e reunion a intercambia pensamento cu Sr. van Zwol, kende conoce Aruba y door di su conocimento di e otro begrotingskamernan den Europa (e ta presidi diferente begrotingskamer na nivel europeo). Pa Sr. van Zwol su experticio a hiba un combersacion riba e grandura di un camara asina pa Aruba y unda e camara aki mester wordo ubica den locual ta e constelacion cu nos conoce aki na Aruba. E trabao di e camara aki ta bay ta pa supervisa e normanan financiero y esaki ta bay tin mester di dje pa un bon maneho financiero pa pais Aruba.

Reunion cu Dutch State Treasury Agency

Den mesun cuadro di trabaonan pa mehoracion di maneho financiero di pais Aruba tambe e mandatario encarga cu finanzas a haci un bishita na Dutch State Treasury Agency kende bao instruccion di BZK ta percura pa Aruba por haya e fondonan pa cubri e fiansanan cu Aruba ta haya for di Hulanda. A bay pa sera conoci y tambe intercambia un paar di informacion cu ta tecnicamente relevante pa locual ta bira e trabaonan cu ta wordo haci ariba nivel di treasury aki na Aruba y tambe na Hulanda. Asina cada banda por tin e conocimiento y por alinia e trabaonan cu tin cu wordo haci.

Reunion cu Vereniging cu Nederlandse Gemeenten

Ademas a bishita e Vereniging Nederlandse Gemeenten, VNG kende ta wordo encabesa pa e alcalde di Den Haag, Sr. Jan van Zanen. Aki a busca e sosten y e cooperacion necesario pa locual ta e mehoracion di e.o. proceso di compra di servicio y producto di gobierno di Aruba. Otro punto ta e parti di e sistematica di presupuesto y cual ta topiconan relevante pa locual ta tema A den landspakket. Si compara cu Hulanda, aki na Aruba tin un solo plano di gobernacion, pero locual tin aki nos lo por wordo compara cu gemeente di Hulanda pa locual ta e administracion financiero. VNG tin un centro di experticio y aki ta unda Aruba ta busca pa por haya asistencia pa por mehora e sistemanan di e proceso di compra di servicio y producto aki na Aruba.

Reunion cu Oscar van Leeuwen di Improven

Riba e mesun topico di tereno financiero a reuni tambe cu Sr. Oscar van Leeuwen di Improven kende hunto cu e partner local Grant Thornton tin den nan encargo e investigacion pa mehoracion di e maneho y control financiero. Esaki pa gobierno por ta mas den control di e situacion financiero di nos Pais y asina saca afo unda nos ta para y kico ta e procesonan cu tin cu cambia pa trece e mehoracion cu kier wordo logra. E mandatario a acentua cu esaki ta e reunion cu mester a tuma luga pa medio di zoom, pa motibo cu covid a haci su entrada na cas di Sr. van Leeuwen. E investigacion aki ta rekeri pa por cumpli cu tema A.1.2 di e Landspakket.

Miembro di delegacion financiero di Aruba a reuni cu ambtenaar di Coho y BZK

Tambe e mandatario a trece dilanti cu miembronan di e delgacion financiero di Aruba a reuni na nivel di ambtenaar, cu ambtenaarnan di Coho y tambe BZK, pa por a intercambia algun informacion tecnico cu ta necesario pa e bon cooperacion entre Aruba cu Hulanda pa locual ta trata e topico di Coho.

Na clausura hunto coleganan minister Tjon, Croes y tambe Minister Plenipotenciario Besaril a reuni cu Minister Rob Jetten pa desea e mandatario exito cu e reto cu tin su dilanti como minister di Clima y Energia di Hulanda. E meta tabata pa asina fomenta e bon relacion politico cu ta necesario pa bienestar di pais Aruba.

Esaki tabata e relato di biahe pa Hulanda y e meta di e minister di Cultura pa atende e Vierlandenoverleg y tambe e reunionnan riba e tereno financiero cu esnan relevante pa e trabao cu mester wordo haci pa e implementacion di e acuerdonan cu tin pa locual ta trata e landspakket pa mehoracion financiero di pais Aruba.

FIN

2022MRT28-03