Ayera tardi Parlamento a cuminsa debati riba e prome semester di e desaroyo di e presupuesto 2019 den un sala renoba tecnologicamente cu ekiponan audiovisual. Pero no a transcuri ni mey ora cu e reunion a cuminsa, ora cu e unico fraccion di oposicion (AVP) a dicidi di bandona e sala di Parlamento.

Ya caba den oranan di mainta prome cu e reunion publico a cuminsa, tabatin miembronan di e fraccion di e coalicion di gobierno (MEP) cu a cualifica e desaroyo di e presupuesto como uno positivo, ahusta na loke a wordo presupuesta. Mientras cu e unico fraccion di oposicion (AVP) tabata skeptico y nan a cualifica e reportahe di e cifranan cu gobierno a mustra di nan entradanan y gastonan, como uno no confiabel y sin conseho di un instancia di supervision financiero manera CAft. Y esaki tabata e motibo cu fraccion di AVP a dicidi di bandona e reunion.

Prome cu e reunion mes a cuminsa, Parlamentario di oposicion, Marlon Sneek a entrega un carta na presidente di Parlamento, unda den nomber di su fraccion a pidi pa pospone e reunion te ora cu nan por dispone di tur documento, ya cu esunnan cu Minister di Finansa a manda no ta completo.

Un conseho cu nan ta considera importante ta esun di CAft. Segun Sneek, tur kwartaal reportahe mester ta compaña cu e rapport di CAft tambe, caminda e organo di supervision aki mester duna nan bista completo riba e cifranan cu gobierno ta presenta. E falta di e tipo di documento aki e ta considera un forma di stroba Parlamento pa haci su trabou di control debidamente.

El a bisa cu den prome instante, CAft ta un organo di conseho of asesoramento di Parlamento. Te hasta den e ley mes di LAft, manera e fraccion di MEP a bin cu cambionan, ta duna mas enfasis cu ta un ‘advies orgaan’ di Parlamento.

Segun Sneek, ta CAft ta esun cu por duna un cifra realistico di kico gobierno a produci y a haya te final di juni ultimo, y kico ta falta; y si CAft ta mira cu gobierno lo alcansa loke a keda presupuesta pa 2019. Y si no ta bay alcansa esaki, kico ta su recomendacionnan. E ta necesario pa sa e recomendacion di CAft pa debati riba nan y determina si gobierno lo bin cu medidanan extra of si nan ta bay introduci algo of si no tin nada pa introduci.

Punto di ordo

Pero tabata net na inicio di e reunion publico ora cu Presidente di Parlamento a bin cu un punto di ordo, caminda Sneek a bolbe trece su punto di bista pa bin cu e reunion aki te ora gobierno por entrega tur documento y specialmente e conseho ultimo di CAft.

Minister di Finansa, Xiomara Ruiz-Maduro a laga sa cu ainda e consehonan di CAft no a bin cla; pero el a compromete cu unabes cu e Colegio di Supervision traha su conseho, e lo mand’e pa Parlamento. Igualmente miembronan di e diferente fraccion di coalicion a laga sa cu nan tambe ta consciente cu mester di mas documentacion, y nan a pidi Gobierno pa cumpli cu e peticion aki.

Sinembargo, nan no a haya motibo si pa suspende e reunion, ya cu tabatin suficiente documento cu ‘cifranan real,’ pa continua cu e reunion aki. Pero esaki a haci cu e miembronan di oposicion bandona den bloke e sala di reunion, ya cu nan ta haya cu gobierno no ta serio den su promesa. Te ayera –segun Sneek– nan a bin haya e prome kwartaal di e conseho di CAft.

Durante e reunion, hopi critica a wordo lansa pa e decision aki, te hasta a wordo pidi pa nan no retira. Un miembro di parlamento cu a critica e actitud aki tabata, parlamentario Setty Christiaan-Yarzagaray, kende a cuestiona e hecho cu e fraccion di oposicion a dicidi di bandona e reunion pa falta di e ultimo conseho di CAft, lagando atras e impresion cu ta CAft ta esun cu mester haci nan trabou como parlamentario. Mientras Ruiz-Maduro a expresa: “Bini pa nos papia…” ya cu esey ta e esencia di un Parlamento.