Durante reunion publico den Parlamento dialuna ultimo pa trata e Nota di Fin di Aña 2022, Prome Minister Evelyn Wever-Croes un biaha mas a duna splicacion tocante Arubahuis.
Investigacion Arubahuis:
Prome Minister a cuminsa pa contesta e pregunta tocante e investigacion cu ta den proceso. Prome Minister a enfatisa: “E investigacion ta andando y ta ami mes a pidi e investigacion y ami lo informa Parlamento tambe”.
Prome Minister a duna di conoce cu el a haya informacion cu den curso di luna aki e partinan di e conseho rond di e investigacion ta keda cla y e ora lo por cuminsa tuma pasonan cu mester tuma. Mientras tanto, Prome Minister a indica cu a trece cambionan tambe inmediatamente na Arubahuis pa asina por tin e siguridad cu tur cos cu ta sosodiendo ta sosode na forma corecto.
“Mi no por duna un tempo fiho pa ki dia por informa Parlamento. Mi kier ripiti locual mi a yega di bisa mas di un occasion. E no ta prudente pa duna informacion prematuramente pasobra lo por daña e investigacion. Si mi daña e investigacion mi por wordo tilda di un banda bisando cu mi a hacie pa yuda hende y di otro banda bo ta wordo tilda cu bo ta perhudica hende. Den casonan asina bo tin cu laga e investigacion cana su curso, nos a trece cambionan caba cu mester wordo treci pa evita cualkier cos cu por bay malo den futuro”.
Directeur di Arubahuis
Pa loke ta directeur di Arubahuis, e procedura ta andando. Tabata tin hopi interes. A apunta un comision pa ‘werving en selectie’ independiente cu lo mester duna Gobierno un conseho riba esaki.
Prome Minister a duna di conoce cu e comision a cuminsa caba cu voor selectie y siguiente nan lo tin conversacion cu e candidatonan pa por yega na e miho candidato. Mientras tanto a prolonga termino di e Directeur ad interim te fin di aña, pa ora keda cla cu e directeur nob,o por tin un traspaso debido tambe.
Pa loke ta trata e problema cu studiantenan, Minister di Enseñansa Endy Croes a informa kico ta su tareanan den esaki. Busca cas na Hulanda ta un problema hopi grandi awor, no pa nos di Aruba of stranheronan na Hulanda sino pe propio Hulandesnan mes. E ta un reto grandi y p’esey ta importante pa studiantenan cu tin pensa di bay studia na Hulanda, inscribi na e fundacionnan cu ta ofrece vivienda di trempan pa asina nan logra haya. Si nan no haci esey, ta bira dificil pa Arubahuis yuda. “Ta berdad cu nos mester duna mas informacion na Aruba y mi ta contento cu Minister Endy a tuma esaki mesora cu e studiantenan a yega Hulanda. Nan a cuminsa evalua y bin cu cambionan necesario”.
