E master plan ‘Reposicionando e Rumbo di Nos Pais’ cu a keda publica dialuna ultimo, tin proyectonan pa acelera e desaroyo economico sostenibel cu ta estrechamente alinea cu e Nacional Strategic Plan (NSP), asina Prome Minister Evelyn Wever-Croes a yega di informa.
Algun proyecto acelerador den e Master Plan ta:
1. Reforma di mercado laboral.
2. Eliminacion di Red Tape of burocracia pa mehora e clima di inversion.
3. Reforma Fiscal.
4. Proyecto di digitalisacion den gobierno y introduccion di identificacion digital (e-Government).
5. Amplia y reforsa e capacidad pa nos traha y cambia ley.
Recientemente dia 24 di october ultimo, gobierno di Aruba a conmemora e di 75 aniversario di Nacionnan Uni. Aunke nos ta forma parti Reino Hulandes, Aruba tambe tin su relacion internacional caminda nos como pais di mundo ta percura pa ta alinea cu e organisacion su metanan global.
Den e cuadro di esaki minister di Finansa, asunto Economico y Cultura, Xiomara Maduro, a referi na e meta global di desaroyo sostenibel (SDG’s) caminda Nacionnan Uni na aña 2015 a proclama e 17 metanan. Den esey Aruba ta participa.
E mandatario a bisa na Bon Dia Aruba cu como pais ya caba nos a logra hopi. Un lustro despues cu a proclama esaki, Aruba tin un plan nacional di strategia (NSP) caminda gobierno a integra e metanan di SDG’s pa e progreso cu nos por logra ta uno balansa y sostenibel.
Igualmente el a bisa cu pa prome biaha presupuesto supletorio 2020 ta bay cu e metanan di SDG’s. Na final di ciclo presupuestario caminda gobierno tin e control of audit di Contraloria General, e instancia aki tambe ta bay tene cuenta awor cu e metanan aki. Segun e mandatario nan a logra desaroya e parti aki cerca e instancia aki.
Den e plan strategico aki tin pa metanan cortico, mediano y largo plaso. Tambe nan a bin cu indicadornan cu nan ta midi e progreso pa alcansa e metanan aki. El a gradici e grupo cu a traha riba e tereno aki ya cu dor di e guia cu Nacionnan Uni a duna Aruba, nos ta percura pa desaroya nan debidamente.
