Durante medida di shelter in place; Minister Bikker ta bezig cu maneho riba prolongacion di permiso

Minister di Husticia, Andin Bikker a anuncia diferente maneho di transicion of temporario cu ta concerni na su ministerio. Aworaki el a bisa cu nan ta den evaluacion cu DIMAS pa wak con nan ta bay atende cu e situacion sin precedente cu a presenta debi na e coronavirus/Covid-19.

Te ainda nan ta bezig riba con nan ta bay atende cu e personanan cu mester pidi prolongacion di permiso. El a trece como ehempel si ta trata di un persona cu ta bay di 7 pa su 8 permiso, pa e persona aki no wordo perhudica debi na e situacion actual.

E mandatario a keda pendiente di trece mas informacion con finalmente nan ta bay haci pa atende cu e personanan aki cu mester renoba nan permiso. “Nos ta evaluando y skirbiendo e maneho. Ora cu nos ta yega na un version definitivo, nos lo informa prensa,” el a bisa

Mirando cu for di diadomingo ultimo a drenta na vigor e shelter in place, e medida aki pa salvaguardia salud publico ta dificulta pa e personanan por ta riba caya pa atende nan asunto personal.

Pa medio di un comunicado cu fecha 27 di maart ultimo, DIMAS a yega di informa cu mesun cos cu otro organisacionnan na Aruba, nan a tuma precaucion pa cu siguridad di su personal y tambe di nan clientenan. Un medida cu nan a tuma ta cu esnan cu tin cita durante e periodo cu e oficinanan ta cera pa publico, lo ricibi un e-mail cu instruccion pa entrega nan permiso online. Esaki ta valido solamente pa esunnan cu tin cita caba. Den caso cu nan clientenan ta confronta problema pa haci entrega di nan peticion di permiso online, nan por tuma contacto cu DIMAS via su e-mail adres: info@dimasaruba.aw

Turista

For di 16 di maart bin ariba tin diferente turista pega na Aruba, ya sea cu nan no por biaha bek of acudi na IASA Migracion Aruba pa nan prolonga nan permiso di estadia.

E mandatario a duna un margen di tres siman for di diabierna ultimo pa e turistanan cu a keda pega na Aruba, ya cu te ainda no por premira ki tempo e situacion aki ta wordo normalisa. Igualmente e maneho aki ta condiciona si e circunstancia cambia, caminda e persona por acudi pa pidi un peticion normal di prolongacion di estadia of si nan kier bolbe nan pais bek.