Luna di October ta conoci mundialmente como e luna di concientisacion di cancer di pecho. Den luna aki Stichting BOB (Bevolkings onderzoek Borstkanker) Aruba tin durante henter luna di october e campaña ‘Social Selfie Contest’. Durante e rueda di prensa di Stichting BOB Sra. Diantha Nuesch, PR and Marketing di Stichting BOB, ta splica e meta di e campaña aki y con pa participa.

Durante e ultimo lunanan Stichting BOB tabata hopi activo cu diferente eventonan nobo banda di e programa di sondeo di pecho di tur dia. Nan a lansa e webinar ‘Screen bomes’,banda di esaki tambe nan a haci hopi presentacion virtual na companianan local y aworaki nan ta lansa nan campaña pa henter luna di october, ‘Social Selfie Contest’.

Sra. Nuesch ta splica cu den e luna aki Stichting BOB ta dedica extra atencion relaciona cu cancer di pecho y prevencion den forma di deteccion. Ayera mainta, durante nan rueda di prensa e stichting a lansa oficialmente e comienso di e cmapaña di concientisacion cu ya pa varios aña ta den colaboracion cu CIBC First Caribbean Bank.

Nos intencion ta pa yega na comunidad di Aruba di un manera diferente, di un manera nobo y pa ricibi aporte di companianan local cu ta yuda nos genera fondo pa Stichting BOB Aruba. E ‘Social Selfie Contest’ ta combina esfuersonan pa conscientisa henter pueblo di Aruba den combinacion cu e oportunidad di gana premio. E participantenan tin e oportunidad di gana premio di nan tienda favorito ora nan demostra nan contribucion ariba rednan social”, Sra. Nuesch a indica.

El a splica tambe cu e forma pa participa ta hopi facil y ta consisti di e siguiente stapnan; “bishita un di e tiendanan cu ta participa den e campaña di Stichting BOB Aruba, haci un donacion den e caha di donacion cu tin presente den e tienda, saca un selfie dilanti e caha di donacion, post esaki ariba Facebook y Instagram, tag Stichting BOB Aruba y pone hashtag di e tienda caminda bo ta, caminda bo a pone bo donacion”.

Pa informacion ariba tur e companianan cu ta participa den e campaña ‘Social Selfie Contest’, por contact Stichting BOB Aruba of bishita nan Facebook page of nan website. E ganadornan di e campaña lo wordo anuncia den luna di november.

Cu bo participacion na e campaña Social Selfie Contest, bo persona tambe ta colabora na e conscientisacion di pueblo di Aruba y prevencion di cancer di pecho. Cancer di pecho ta hopi presente mundialmente y e cifranan ta mustra cu na Aruba esaki tambe ta e caso, pero hunto nos por corda otro ariba e importancia di e sondeo di pecho, motiva y inspira otro pa participa pasobra deteccion di cancer na pecho ta sumamente importante”, Sra Nuesch a agrega,

Segun el a splica, e meta di campaña ta pa recolecta fondonan pa asina Stichting BOB por sigui duna informacion valioso na pueblo di Aruba y por sigui cu e programa di sondeo pa e hendenan muhe entre 45 y 75 aña di edad. E programa aki ta invita e hende muhe cada dos aña pa participa y haci su sondeo.

Sra. Nuesch a indica cu Stichting BOB ta mira un aumento den participacion y hendenan cu ta presenta nan cita pa e programa di sondeo, locual segun Sra. Nu esch kiermen ta“duna nos hopi animo pa sigui cu campañanan asina aki y sigui duna informacion den forma di charla den forma virtual pa mas hende tende di nos, sa di nos y participa.”.

Pa locual ta trata e topico di cancer di pecho mes na Aruba, Sra. Nuesch a splica cu na Aruba e tema di cancer di pecho ta un tabu ainda y hopi biaha ta duna e sentimento di berguensa pa algun persona cu hopi biaha ta e motibo pa kico no ta comparti hopi ariba tema entre e comunidad. Y e ta splica tambe cu na Aruba tin hopi e sentimento“si mi no ta sinti nada mi no tin nada” y e ta señala cu cancer di pecho ta algo hopi silencioso.

E poder di mamografia, e sistema cu nos ta usa pa haci chekeo di pecho ta cu bo por wak irregularidad nan den pecho den un fase hopi mas prome cu bo cuminsa sinti algo, dus bo mes ta kere bo ta saludable pero e mamografia por identifica e diferencianan e cambionan den e pecho, dus e ora ey bo ta hopi na tempo y mas na tempo bo ta,miho pabo y menos invasivo e tratamentonan ta. Bo por salba bo pecho, bo por salba bo bida, Deteccion na tempo ta e manera pa combati cancer di pecho”, e la agrega.

Pa locual ta trata e cifranan di cancer di pecho, el a señala cu tin e tendencia cu e cifranan ta bahando locual tin di haber cu mas hende ta papia di e topico, mas hende muhe ta bin cu nan storianan dilanti. Sra. Nuesch ta informa tambe cu ainda e cifranan ta mustra cu e mayoria di hende muhe cu ta haya cancer di pecho ta entre 45 y 75 aña di edad, eynan tin un aumento hopi drastico compara cu hende muhenan mas jong y esunnan ariba di 75 aña unda e cantidad ta hopi mas abou. Pero e ta sigura cu e cifranan aki no ta nifica cu si un persona ta mas jong of mas grandi e no ta haye. Pesey Stichting BOB semper ta bisa pa tur edad examinacion propio ta sumamente importante

Por ultimo el a haci un yamada na pueblo di Aruba en general pa “participa den e campaña aki, no solamente pa gana, pero tambe pa hunto nos kibra e tabu relacion na e topico di cancer na pecho y deteccion na tempo. Hunto nos por traha ariba esaki”.