Durante firma di CAO pa tres aña FTA a elogia Aruba Bank su beneficionan pa nan empleadonan

Ayera mainta gerencia di Aruba Bank y sindicato FTA a firma un contract colectivo (CAO) pa tres aña. Ambos parti a elogia e echo cu e negociacion di e CAO a bay lihe, den menos di dos luna y den un bon ambiente, caminda e trahadonan a haya adelanto.

Den presencia di director ehecutivo, Nataly Simmons, e Regional Human Resources di Aruba Bank, Barbara Bronswinkel a bisa cu gerencia di e banco ta bin trahando pa basta tempo pa crea un luga di trabou caminda e experiencia di nan empleadonan ta uno superior. Mescos cos cu nan ta purbando di yega na un experiencia superior pa nan clientenan.

“E enfoke semper ta ariba empleadonan y esaki ta un cos adicional na cual nos a logra yega pa nos empleadonan,” el a bisa.

E echo cu a logra cera un negociacion di CAO hopi lihe -segun Bronswinkel- ta pasobra ta considera Aruba Bank un banco hopi stabiel. Nan ta traha hopi interno y externo pa garantisa e exito cu nan tin. “Esaki ta visibel full rond”, el a declara.

Pa loke ta aumento di salario, Bronswinkel a splica cu e ta mara na e trabou di e mesun empleado cada aña. Nan prestacion di trabou ta wordo evalua anualmente, caminda e empleado por yega na remarca pa un aumento di salario. E ta los di e compensacion cu e empleado ta haya a base di aumento di costo di bida of inflacion stipula den e CAO. “E banco mes ta bezig evaluando structura di salario”, el a laga sa. El a laga sa cu den e CAO nobo aki tin cierto beneficionan cu e trahadonan a bay dilanti.

Sindicato FTA.
Presidente di FTA, Hubert Dirksz a yama danki na gerencia di e banco cu a facilita cu e negociacion a bay rapido. Tambe na su colega Rudy Geerman, kende ta esun cu a hiba e negociacion aki den nomber di e trahadonan hunto cu nan representantenan, Mirla Koolman y Alexander Arends. E ta haya cu e proceso di CAO aki mester bira un ehempel pa otro companianan. “No ta sin mas cu bo por yega na tin un bon compania y tin bon beneficio”, Dirksz a declara.

E adelanto cu e empleadonan a haya ta riba e gratificacion por ehempel, ora cu empleado ta cumpli añanan di servicio. Tambe riba dianan liber cu pago y otro beneficio cu tin di haci cu ahustacion di salario basa ariba costo di bida. “Ta algo cu nos ta aplaudi,” el sindicalista a indica.

Dirksz a agrega cu di e forma aki e empleadonan no ta keda atras den nan poder di compra. Igualmente e CAO tin puntonan relaciona cu e beneficionan social: fondo di spaar, compensacion pa cuido di yiu y otro beneficionan.