Den un entrevista mira pa alrededor di 17.1 miyon persona diadomingo ultimo, prins Harry di Reino Uni a papia desinhibidamente tocante e problemanan den su famia, su relacion cu su wela Reina Elizabeth II, y e motibonan cu el a separa di su debernan den famia real Britanico.
Harry y su esposa, actriz Mericano, Meghan Markle, a sinta den hardin cu Oprah Winfrey y a discuti tur loke a conduci na nan controversial salida di e famia real, conoci como ‘Megxit’.
Sin duna detaye ni menciona persona specifico, e pareha a indica cu tabatin instancianan di racismo contra Meghan – ken su mama ta color scur – y preguntanan tocante color di cuero di nan yiu homber, Archie. Ademas, Meghan a indica cu su salud mental a deteriora na tal punto cu e tabata pensa di comete suicidio. Den esaki, Meghan a indica cu no tabata posibel pa ricibi ayudo medico; sinembargo, ora Winfrey a puntra Harry pakico no por a haya ayudo, Harry a contesta cu e no a sinti cu por a pidi ayudo ni papia di esaki cu su famia.
Den e entrevista a abstene di haci acusacionnan concreto. “Ken?” tabata un pregunta cu Winfrey a ripiti varios biaha, pero tanto Harry como Meghan a nenga di punta dede. Sinembargo, Harry a laga cla cu su relacion cu su ruman homber, prins heredero William, ta ‘lehano’ pero bon, y a elogia su wela, reina Elizabeth II, indicando cu no ta cune cu nan tin problema. Den nan anecdotanan di e mal trato cu nan a ricibi, nan no a indica si ta trata di miembronan di famia real of trahadonan di e palacio. Loke si Harry a indica, ta cu mayoria di su problemanan ta cu su tata, prins Charles, kende ta prome na linea pa e trono. Maske no a menciona esaki directamente, e impresion cu Harry a duna tabata cu mayoria di nan acusacion tabata contra Charles y su esposa, Dukesa Camilla di Cornwall.
El a bisa cu na dado momento Charles a stop di contesta su yamadanan y cu nan relacion mester di trabao. Maske el a bisa cu tin ‘hopi dolor’ den e relacion, ‘mi lo continua hacie mi prioridad pa purba di sana e relacion ey’, el a bisa.
Nan segundo baby ta yiu muhe
Durante nan entrevista, e pareha, cu notoriamente ta hopi protectivo di nan privacidad, a comparti videonan familiar di nan yiu Archie, y tambe a haci un revelacion tocante nan segundo yiu, di cual Meghan ta na estado actualmente. “E ta un yiu muhe!”, Harry a anuncia.
Potret di Associated Press.
