Durante e di 16 Reunion Ministerial di CFATF na Miami, e mandatarionan presente a trata e peticion di Merca pa traha mas di cerca cu e paisnan cu ta miembro di e Caribbean Action Task Force (CFATF), cu e meta pa contraresta labamento di placa y financiamento di terorismo den e region di Caribe.
Di parti di Aruba, Minister di Finanzas a expresa su sosten pa e miembresia di Merca den CFATF. Segun un comunicado di gobierno, den su intervencion, e mandatario a trece dilanti cu ta di aprecia cu Merca lo kier traha na un nivel mas profundo cu Caribe.
Ya caba Merca a bin ta demostra su interes den e region Caribense door di su participacion activo como observador di CFATF. Ta importante pa remarca cu Merca ta hunga un rol crucial como un socio strategico pa e region Caribense. E lasonan economico, di seguridad y diplomatico entre Merca y e region Caribense ta uno fuerte, y ta trece cune crecemento y stabilidad mutuo.
Di mes manera, Caribe ta un aliado importante, ofreciendo proximidad geografico y colaboracion den area clave manera comercio, regulacion financiero y desaroyo sostenibel, cu lo por wordo intensifica y reenforsa. Pa e motibonan aki, Merca como un socio mutuo den CFATF ta recomendabel y Aruba ta sostene e miembresia di Merca den CFATF.
Por informa cu e miembresia di Merca di CFATF a wordo acepta pa e mayoria presente.
