ORANJESTAD – E siman aki ta tumando luga e ‘17th OCT-EU Forum y OCTA Ministerial Conference’ na Tahiti, Polynesia Frances. Como Aruba su Territorial Authorizing Officer (TAO), Minister di Finansa, Asuntonan Economico y Cultura, mr. Xiomara Ruiz-Maduro ta presente tanto na e forum como e conferencia importante aki, cu sigur ta na beneficio di nos pais.

Ruiz-Maduro a duna di conoce cu e meta di su presencia na e Forum di OCT-EU y e conferencia di OCTA ta pa como TAO, finalisa y firma e acuerdonan necesario pa asina Aruba por ricibi e suma di 13,6 miyon euro for di Union Europeo, pa por institui un SISSTEM Faculty na Universidad di Aruba. E facultad nobo aki lo brinda educacion riba nivel di bachelor y master den e ramo di ciencia, tecnologia y matematica, y sostenibilidad respectivamente.

Banda di esaki, e facultad di SISSTEM lo facilita e implementacion di programanan di investigacion y innovacion, cu ta resulta den promove publicacion y programa di certificacion riba e tereno di sostenibilidad.

Aruba na varios ocasion a ricibi fondo Europeo pa por a realisa proyectonan na beneficio di nos comunidad, entre otro; Museo Arkeologico; Parke Arikok; Marine Park; Erasmus Fund pa Universidad di Aruba, y awor e SISSTEM Faculty lo bira realidad por medio di e 11 Fondo di Desaroyo Europeo.

Pa acomoda y desaroya e Facultad di SISSTEM, Maria Convent lo wordo renoba den cooperacion cu UNDP, cu ta e programa di desaroyo di Nacionnan Uni, y Universidad Catolico di Leuven, KU Leuven, cu lo yuda pa desaroya e curriculum pa e facultad.

Ruiz-Maduro a expresa di ta sumamente contento cu Aruba a bin na remarca pa ricibi e fondo aki, cu sigur pa nos pais ta un bon noticia, como tambe importante y necesario pa e rumbo di innovacion cu Gabinete Wever-Croes ta hibando nos pais. Cu e facultad aki lo crea mas oportunidad pa nos hobennan scoge un estudio na Aruba mes.

“Esaki no ta un fiansa, e no ta un debe cu nos a traha. Esaki ta un regalo cu nos a haya di Union Europeo, pa cual e 13.6 miyon euro aki ta bale la pena tur e esfuersonan cu pais Aruba a haci pa yega na e fondonan aki, y pa e fondonan aki wordo destina pa un SISSTEM Faculty na Universidad di Aruba”, Ruiz-Maduro a enfatisa.