Diamars anochi cu 74 caso positivo di Coronavirus/Covid-19 y bayendo na e di cuater siman cu a wordo informa -dia 13 di maart ultimo- riba e prome casonan di coronavirus/Covid-19 na Aruba, Prome Minister, Evelyn Wever-Croes a informa cu nos ta bayendo “OK” pero no full bon.
Sinembargo durante e dianan venidero aki di Semana Santa, gobierno a dicidi di reforsa e medida di shelter in place. Diabierna Santo y Diadomingo di Pasco Grandi, tur luga lo ta cera. E unico excepcion ta boticanan, pompstation (7am t/c 7 pm), dokter y negoshinan cu ta duna servicio di deliver (11am t/c 7 pm). Tampoco lo tin baymento di lama ni beach, den e dianan aki. Gobierno ta considera e dianan festivo aki como dianan di riesgo y p’esey nan a dicidi di bin cu medidanan mas stricto, caminda bay lama den gruponan grandi no ta permiti.
Ademas e ta recorda cu tin e samenscholing verbod cu ta prohibi concentracion of grupo di cuater hende of mas. Nan ta prohibi pa bini hunto na lama (beach), park, etc… Tur esaki pa evita cu e virus di Covid-19 lo sigui plama den comunidad.
Ta asina cu awe diahuebs ora cu e toque de queda ta cuminsa for di 9’or anochi te 6’or di mainta, sigui despues pa e estado di shelter in place di 6’or di mainta te cu 9’or anochi, gran mayoria di cos ta keda cera te cu diasabra pa 6’or di mainta. Durante e shelter in place den dia lo keda habri boticanan, pomp station, dokter y negoshinan cu ta duna servicio di deliver.
Diasabra e situacion lo ta un tiki mas normal manera e ultimo dianan aki di shelter in place. Pero anochi e toque de queda ta cuminsa atrobe y nos ta keda asina diadomingo cu tur cos cera. Dialuna mainta pa 6’or e situacion lo bira un tiki mas normal.
