Diaranson mainta durante conferencia di prensa, Minister di Finanzas a anuncia cu e Reparatietoeslag pa Pensionado ta subi cu 30 florin y ta bira 200 florin desde augustus 2024.
E mandatario a splica cu durante e Cambio di Presupuesto 2024 a indica cu Gobierno lo pone suma disponibel pa asina por aumenta e Reparatietoeslag di Pensionado y Trahadornan, pero a keda pendiente pa haci e calculonan necesario pa stipula con hopi por aumenta e ayudo aki cu Gobierno ta brinda na pensionadonan cu ta ricibi AOV y AWW y tambe na trahadornan cu ta gana un salario mas abou cu 2500 florin pa luna.
Pa locual ta trata e pensionadonan, e minister a informa cu tin un aumento di 30 florin riba e 170 florin di Reparatietoeslag desde augustus 2024. Esaki kiermen cu tur pensionado di SVB lo cobra e suma di 200 florin na Reparatietoeslag ora e pago di pensioen pasa riba dia 31 di juli 2024. Segun SVB a informa, un total di 19.548 pensionado di AOV y 1,336 pensionado di AWW ta cobra e 200 florin.
Minister Maduro a indica cu e Reparatietoeslag pa trahadornan cu ta gana menos cu 2,500 florin pa luna ta subi cu 50 florin y ta bira 175 florin desde augustus 2024. Pa cu esaki e mandatario a informa cu den e dianan nos dilanti e tabel di Departamento di Impuesto lo keda publica pa oficialisa e subida aki.
