Diabierna pasa, Minister di Finanzas, Xiomara Maduro tabata tin e placer di por a ricibi bishita di Presidente di Corte Comun di Husticia, Sr. Maurtisz de Kort hunto cu Sr. Luttge, kende ta encarga cu e parti financiero pa Corte Comun di Husticia.
Segun un comunicado di gobierno, e tabata un encuentro ameno den cual minister Maduro a repasa un rato e recuperacion di Aruba den e ultimo añanan y a combersa tambe riba e retonan cu tin na e momentonan aki riba e tereno financiero di nos Pais.
Minister Maduro a haci uso tambe di e ocasion pa asina gradici Corte Comun di Husticia pa e solidaridad cu a keda demostra den e añanan 2020 pa 2024 den cual nan a ricibi menos fondo di aporte di parti di Aruba, pa asina brinda espacio pa nos por a stabilisa e finanzass di nos pais durante y despues di e pandemia.
Na final Minister Maduro como mandatario encarga cu monumentonan di Aruba, a gradici Sr. De Kort y Sr. Lutte tambe pa e hecho cu ta haci uso y ta cuida di e Edificio di Corte cu ta un monumento di nos Pais cu ta cede di husticia na nos Pais ya pa mas di 50 aña.
