Durante e programa di e asamblea general di e Organización de los Estados Americanos (OEA), cu e siman aki ta tumando luga na Lima, Peru, Prome Minister Evelyn Wever-Croes, como Prome Minister di Aruba y como parti di Reino Hulandes, a haya e oportunidad pa participa como orador den e forum tocante e liderazgo de hende muhe den politica internacional pa combati e desigualdad y e discriminacion di hende muher. Un dialogo di nivel halto cu e Ministernan femenino di Relacionnan Exterior di America.
Prome Minister a remarca cu ta tristo pa sa cu desigualdad entre hende homber y hende muher ta aumentando na mundo, y nos region ta afecta fuertemente pa e desigualdad aki. Tin indicenan hopi halto di desigualdad den nos region cu ta afecta directamente e bienestar di tur. Datonan alarmante di temanan di femicidio y violencia contra hende muhe ta un prueba di e indice halto di desigualdad.
Gobierno di Aruba y Reino Hulandes ta reconoce e urgencia pa redobla esfuersonan pa loke ta trata igualdad di genero. Mientras cu desigualdad di genero ta empeorando riba nivel mundial, violencia contra hende muhe y mucha muhe ta aumentando y trahadonan den e sector informal, kendenan mayoria ta hende muhe, ta esnan cu ta wordo mas afecta economicamente.
Segun datonan di CEPAL di 2020, 19% di hobennan di 15 pa 24 aña den Latino America no ta studia ni traha, di cua porcentahe ta alcansa 26% entre hende muhe. Motibonan principal den e caso di hende muhe ta e trabounan di cuido na cas cu no ta wordo paga.
Segun e informe La pandemia en la sombra di CEPAL, por lo menos 4091 hende muhe tawata victima di femicidio den 26 pais (17 pais di Latino America y 9 pais di Caribe) den aña 2020. E datonan aki ta hopi preocupante. Pa e motibo aki tambe mester actua awo.
Reino Hulandes ta uni su mes na e grupo di piononeronan pa adopta un ‘Maneho di relacion Exterior Feminista’. E base ta cu ta existi un relacion directo entre igualdad di genero, prosperidad economico y siguridad nacional. Cu igualdad di genero mas amplio, e recursonan di sociedad por ta mas balansa.
Den e principio di e ‘Maneho di Relacion Exterior Feminista’, igualdad di genero mester ta central den tur acuerdo exterior: den cooperacion di desaroyo, comercio internacional, defensa y diplomacia. Igualdad di derecho mas grandi y eleva, ta conduci na mas prosperidad economico, mas desaroyo sostenible y mas siguridad internacional pa tur. Tur lo beneficia di igualdad di genero. Hende homber y hende muhe.
Ta importante tambe pa remarca cu pa medio di un ‘Maneho di Relacion Exterior Feminista’ por contribui tambe na un mundo mas husto, na unda cu hende muhe y hende homber, por tin e mesun derecho y oportunidadnan. Pa haci esaki posible, ta necesario pa promove tratadonan y acuerdonan riba e tema.
Si di berdad nos kier atende cu e causanan fundamental di desigualdad y pobresa, ta crucial pa aplica un perspectiva di genero den tur loke nos haci.
