“E grupo di hende cu ta practica economia facil dia pa dia ta hayando nan mes cu mas reto”, asina Lito Lacle, vocero di Cuerpo Policial Aruba a enfatisa. E ta referi na esunnan cu tin como trabou, horta den cas di hende, den diferente bario rond di nos isla. Cuerpo Policial a institui un unidad special dedica na e tipo di casonan asina aki so.
Den e maneho di e organisacion policial a pone ladronicia den cas como un asunto di prioridad, debi na hopi keho drentando. Cu e fenomeno di ciudadanonan cu ta huur nan cas cu turista, a trece cune tambe mesora un aumento drastico di ladronicia den e casnan aki specificamente. “Nos a cuminsa nota un caida, pasobra mayoria di e gruponan aki entretanto ta cera”, asina Lito Lacle a garantisa.
E ekipo di 5 recherche trahando den e unidad di “Team Woninginbraken” ta investiga tur caso di ladronicia den cas rond Aruba, pues di tur districto. Nan ta raporta cu na luna di april 2016 a ricibi 31 denuncia aden di ladronicia den cas. Por mir’e como un averahe di 1 caso pa dia. Pa esey e investigacionnan cu e recherchenan a realisa, den cooperacion cu Ministerio Publico, a conduci na 8 “huiszoeking” den cual a descubri 3 arma di candela y na tur a detene 16 sospechoso.
Na final di luna e recherchenan di “Team Woninginbraken” a entrega un total di 5 dossier na Ministerio Publico, pues esey ta casonan completamente investiga, cera y cla pa presenta cu un acusacion penal dilanti Hues.
E cifranan aki ta solamente di e luna di april ultimo, pues tur luna ta percura pa investiga mas di e tipo di casonan asina, den un esfuerso pa gara e ladronnan cu ta horta den cas. Cu e experencia di e team aki, nan ta sigui e patronchi di hortamento di cerca, pa cual ta avisa patruyanan di areanan di risico pa aumenta visibilidad policial y alabes pa tira bista riba algun sospechoso specifico. Cu e maneho aki, combina cu persecucion di e ladronnan “di custumber” ta logrando pa frena e tendencia aki, tanto den casnan di nos localnan como den casnan cu ta huur cu turista.
Fuente: Comunicado KPA
