Durante 2019 menos referendum y menos intermediacion di Mediador di Gobierno

Durante 2019 un total di 8 referendum a wordo convoca pa departamento di Mediador di Gobierno a base di peticion di e sindicatonan.

Mediador di Gobierno, Anselmo Pontilius a bisa cu di 8 peticion di referendum, 7 di nan a tuma luga. Di nan FTA a pidi 5 referendum, STA a pidi un referendum y SEPPA a pidi un referendum. Tin un referendum cu a wordo pidi aña pasa y awor e lo tuma luga dia 10 di januari cu lo bira e prome referendum di 2020.

E total di referendum pa 2019 tabata menos cu 2018 cu nan tabatin 14 referendum y na 2017 tabatin 15 referendum. Pues entre aña pasa y e añanan inmediatamente anterior, ta existi un diferencia di casi mita.

Segun Pontilius cada aña ta resulta dificil pa bo calcula cuanto referendum tin, ya cu esaki ta depende di e sindicato y e trahadonan cu ta dicidi di organisa nan mes.

“Den todo caso di e aña cu a caba ta menos,” el a bisa. Den e mayoria di e referendum celebra durante 2019, e sindicatonan a haya e representacion sindical.

Intermediacion.
Ademas di convocatorio di referendum, departamento di Mediador di Gobierno a intermedia den diferente situacion presenta durante 2019. Pontilius a bisa cu si nan ta compara e cantidad di reunion di intermediacion, aña pasa e ta un poco menos cu 2018 y 2017. Pero bo por ripara tambe cu den 2017 y 2018 tabatin mas actividad sea di negociacion di contracto colectivo (CAO) of tambe referendum.

“Esaki no ta kita afo cu nos a wordo acerca den e situacion di diferente compania den cual tanto sindicato STA como sindicato FTA a pidi mediacion,” el a bisa.

E mediacion aki a wordo mira specialmente den sector casino y sector di construccion. Por cierto den construccion aña 2019 a cera cu sindicato STA y tambe e dunado di trabou y contratistanan di casi nuebe compania cu ta cay bou e paraplu di WAB a sinta na mesa. E biaha aki nan tin serio intencion di finalisa nan proceso largo di negociacion di contracto colectivo. Dia 14 di januari venidero ta e prome dia di 2020 cu e partidonan aki ta bek na mesa pa mira si nan por sali for di e parti di e aumento general di salario.