Presidente di Colombia, Ivan Duque, y su mentor ex-presidente Alvaro Uribe ta den centro di un scandal politico despues cu a keda conoci algun audio di varios combersacion di e ganadero Jose Guillermo Hernandez, asesina na Brasil, cu ta involucra nan den un supuesto compra di voto den campaña electoral di aña 2018.
E periodista Gonzalo Guillen a sigura den e website La NuevaPrensa cu un investigacion di Fiscalia Colombiano, inicia pa aclaria un asesinato na Barranquilla atribui pa Hernandez, a haya combersacion den cual e ta bisa cu e ‘ta e centro di un operacion di compra di voto na Costa Nort pa e presidente actual, Ivan Duque, pa orden di ex-presidente y senador Alvaro Uribe’.
Na segunda buelta di eleccion pa presidente, na juni di 2018, Duque di partido Centro Democratico funda pa ex-presidente Uribe, a derota e candidato di iskierda Gustavo Petro, lider di e movemento Decentes.
Despues di loke Guillen a revela, e revista Semana a bisa cu a haya acceso pa mas di 250.000 registro di grabacion di Hernandez den cual ta papia di su cercania cu personalidadnan di e politica Colombiano.
Dilanti di e scandal aki di supuesto compra di voto na fabor di e campaña di Duque, ex-presidente y actual senador Uribe a rechasa e acusacionnan aki y a defende su carera politico y e transparencia di e ehercicio di poder di Duque.
Diabierna ultimo, Duque a contesta riba e amistad supuesto y su cercania cu Hernandez y a sigura cu nan a topa den algun evento social so, den cual nan a saca varios potret y a papia di e relacion di amistad cu nan mayornan tabatin.
