Tur aña DUO ta haya alrededor di 800 miyon euro di debe bek, esaki ta pa motibo cu ex studiantenan ta pagando nan debe manera mester ta.
Solamente 2% di debenan ta keda exsonera segun cifranan cu radio BNR a pidi. E sistema bieu tabata exitoso segun Alex Rutten di asociacion di studiantenan LSVb. E cifranan ta trata e sistema bieu di financiamento di estudio. E financiamento basico cu a keda elimina den 2015, tabata duna e studiantenan un suma cu nan no mester a paga bek. E suma tabata depende di e entrada di mayornan. Studiantenan por a haci un fiansa banda di e suma basico. Por paga e debe bek den 15 aña. Si e ex studiante no por paga bek den e termino aki, e debe ta keda exsonera. Esaki ta solamente den casonan cu nan entrada ta mucho abou. For di cifranan di DUO (financiamento di estudio) ta indica cu pago bek ta cana bon. Actualmente tin un mayoria politico pa bini cu e sistema bieu bek, pero e ta riba agenda pa despues di eleccionnan. E sistema actual no ta alcansabel segun Rutte. E debe ta keda crece tur luna. E promedio di debe pa studiantenan den e sistema di fiansa nobo ta 21.000 euro. Studiantenan tin 35 aña pa paga bek despues cu nan caba nan estudio.
