Servicio Ehecutivo di Enseñansa (Dienst Uitvoering Onderwijs, DUO) di Hulanda ta presente na Aruba te proximo siman diahuebs na balie di Departamento di Enseñansa tras di Wendy’s Boulevard pa yuda ex studiante averigua con ta paga bek nan prestamo, pero tambe pa yuda futuro studiantenan cu kier financia nan estudio. DUO a duna un charla na auditorio di EPI pa e gruponan dialuna y diamars ultimo.

Bon Dia tabata presente durante e anochi unda a duna informacion na ex studiante cu a haya un prestamo di DUO den pasado y cu awo ta bek riba e isla, pa asina yuda nan nabega e structura di paga bek debe cu e mesun trahadonan di DUO ta admiti por bira hopi complica pa via di e lista largo di reglanan cu e departamento Hulandes ta implementa.

Esunnan cu a duna e presentacion tabata Marit Verbogt (banda robes riba potret) y su colega Ingrid Jordens (banda drechi riba potret), kende ambos ta traha na DUO como relacionista publico. Durante e presentacion a enfoca riba e 3 diferente set di regla cu ta den efecto pa paga bek debe na DUO. Bou cua set di regla un studiante ta cay ta depende den ki aña nan a pidi e prestamo. E prome set di regla ta pa ex studiantenan cu a pidi financiamento entrante of prome cu aña escolar 2009-2010, e di dos set di regla desde 2009-2010 y finalmente e reglanan mas nobo cu a bin na efecto den 2015. DUO semper ta pidi colaboracion di studiante pa calcula nan entrada ora di cuminsa paga bek nan prestamo, mirando cu nan no por haya e informacion aki automaticamente manera cu ta pasa na Hulanda.

Verbogt a conseha pa studiantenan cu tin e opcion pa cambia pa un set di reglanan mas nobo, pa haci esaki, mirando cu den liñanan grandi e set di reglanan mas moderno ta beneficia studiantenan mas. Esaki sinembargo, studiantenan no por haci despues cu nan a cuminsa paga bek caba. Esaki por maximo prome cu dia prome di januari di 2020, pues Verbogt a conseha pa pensa bon ki set di regla kier bay uza, y pa tuma contacto cu e departamento pa clarifica cualkier duda. Diferencianan primordial ta cu e prome dos set di regla ta indica cu por paga e debe bek den 15 aña, mientras cu e di tres (e mas moderno) por paga bek den un periodo di 35 aña. Tambe pa e prome set di regla no ta exigi pa inclui pareha den e calculacion pa determina cuanto e ex studiante mester paga a base di su entrada (y di su pareha), cual si ta exigi pa e 2 set di reglanan mas nobo.

Paga via cuenta local y pidi DigiD na VNO.
Un di e medidanan special cu DUO a tuma pa (ex) studiantenan Caribense ta habri oportunidad pa por paga via banco local. Esaki pasobra ta preferibel pa evita gastonan astronomico si mester manda placa via e sistema bankero trans-Atlantico. Studiantenan por paga pa luna, pero tambe pa aña. Si ta scoge pa haci uzo di e oportunidad aki, cual tambe ta posibel si ta paga via banco Hulandes of e via trans-Atlantico, e pago anual mester drenta prome cu 30 di november di e aña.

Apart di e medida aki, studiantenan cu no ta ricibi post regularmente of tin dificultad pa haya esaki por pidi pa (re-)activa nan cuenta di DigiD (portal digital di gobierno Hulandes) na Representacion di Hulanda na Oranjestad (Vertegenwoordiging van Nederland in Oranjestad, VNO). Esaki segun Jordens ta un manera hopi mas facil di maneha comunicacion cu DUO y asuntonan relaciona cu prestamo cu studiantenan ta haya via e institucion.

DUO ta presente na Aruba pa dos siman, entrante ayera, te cu diahuebs otro siman. Nan ta pidi tur ex of futuro studiante pa pasa libremente entre 9 or pa 11 or of di 1 or pa 4 or na Departamento di Enseñansa na Frankrijkstraat (Tras di Wendy’s Boulevard, mesun edificio cu FCCA) pa cualkier duda of informacion.