(CuraçaoChronicle) – E agencia di ehecutivo di educacion DUO lo bishita tur e islañan den Caribe na fin di september pa provee ex studiantenan cu informacion tocante e pago di nan prestamo, pues e studielening. Esaki a keda anuncia pa gobierno Hulandes den Caribe den un comunicado di prensa.
Segun e plataforma di finanzas pa educacion, varios studiante ta pagando un suma hopi mas halto riba nan studielening di loke ta necesario. E mensahe ta cla; No paga dimas.
DUO hopi biaha no tin informacion tocante e ingreso di e studiantenan pa motibo cu esaki no ta keda reporta adecuadamente. Como resultado, e suma cu ta stipula pa paga pa luna por ta hopi mas halto di loke ta necesario. DUO ta determina e cantidad aki a base di e salario actual, cual ta evalua prome cu stipula e cantidad cu mester paga y claramente prome cu cuminsa paga.
E studiantenan cu ta eligibel pa un recalculacion di nan pago pa luna por spera un e-mail fin e luna aki. DUO ta sigura cu e cantidad di pago pa luna nunca lo aumenta despues di e recalculacion.
Oficinañan di servicio publico lo ta habri riba tur e islañan, cuminsando for di fin di september unda studiantenan por ricibi asistencia. E orañan di apertura exacto lo por ser mira riba e website di DUO, unda studiantenan por atende Webinar pa ricibi informacion adicional.
