Denuncia bisiña supermarket yanana Br 4 (1).JPG

– Habitantenan di Yanana a dicidi di vocifera nan disgusto publicamente, despues cu nan a manda diferente carta no solamente pa  instancianan manera Cuerpo di Polis, Brandweer y Departamento di Asunto Economico,  sino pa ministernan tambe contra un supermercado cu a habri su porta recientemente den e bisindario aki.

 

E problema relaciona cu tur sorto di negoshi den area residencia, sin tene cuenta cu “Ruimtelijke Ontwikkelingsplan”, ta algo cu ta tumando luga keto bay. Pero e habitantenan di Yanana a dicidi di no neglisha e echo aki, y crea  un precedente pa stop cu e “free for all” aki  di dunamento di permiso pa bin cu negoshi  unda cu ta; sin tene cuenta cu nos propio hendenan.

Despues cu nan disgusto a wordo divulga den prensa ayera pa medio di un comunicado cu nan mes a manda, Bon Dia  Aruba a dicidi di bishita e bario aki pa wak e situacion aki di cerca; y  papia cu algun di e habitantenan di Yanana, pero cu e doño di Yanana Supermarket tambe.

 

Yanana

Yanana ta practicamente un caya di 32 cas, caminda nan doñonan ta bibando pa basta aña caba den e area aki. Den pasado e tabata un tereno masha grandi mes di famia Ras, unda tabatin criadero di bestia entre nan baca. Ainda un habitante ta conserva un hemchi pa lechi cu a keda como testigo tangibel di e tempo aya. E nomber di Yanana a wordo scogi na feliz memoria di Sra. Yanana cu tabata cria baca y bende lechi y keshi.

Despues e tereno aki a wordo bendi pa lotenan caminda entre 1970/1975 e bario aki a wordo lanta como un proyecto di vivienda so bou encargo di Stichting Nos Mes Cas.  A pesar di e desaroyo cu a bin tumando luga  den e area aki entre otro cu e compleho residencia San Barbola Residence  y Tabarabana Residence, e habitantenan di Yanana, mayoria di nan di edad halto, tabata biba sin mayor preocupacion. Sinembargo e presion di trafico a bira pisa y e caminda a wordo deteriora.

 

Pero e preocupacion a bin ora cu di anochi pa dia nan a wak cu un cas situa den parcela Yanana 14 cu tabata na benta pa basta aña, a wordo transforma den supermercado.  Pa nan tabata full un sorpresa con un bario exclusivamente residencial como “woonwijk” ta bin topa cu un supermercado. Algun di e habitantenan a vocifera cu niun  momento a wordo publica aviso tocante e binimento di e negoshi aki. Kende a duna nan e permiso aki y di ki forma nan a yega na e permiso aki??? Esaki tabata e preguntanan cu tabata draai cerca e habitantenan di Yanana.

 

Preguntanan sin contesta

E habitantenan cu a papia cu Bon Dia Aruba  a señala cu nan no tin nada contra di e doñonan di e supermercado aki di origen Chines, sino riba e binimento di un negoshi den un area residencial cu ta kibra e trankilidad y siguridad di nan. Ya caba cerca di Yanana tin varios supermercado ta operando, y nan no mester di un mas cerca di nan cas tampoco.

 

Nan a manda cartanan pero a pesar di esey e supermercado a habri. Pero e ultimo drop cu a basha e kelki di pasenshi di e habitantenan di Yanana tabata e aviso cu a sali den prensa  di un peticion haci na Departamento di Legislacion y Asuntonan Huridico pa un “slijtvergunning” pa e parcela Yanana 14, unda Yanana Supermarket ta situa. Ya caba algun bisiña a cuminsa keha, ya cu sin bebemento di alcohol  legalmente, tin situacion di molester cu no ta laga nan drumi trankil. Nan no por imagina ora cu bebemento di bebida lo tuma luga legalmente.

 

Igualmente e bisiñanan tin obhecion pa gobierno otorga un “slijtvergunning” na e supermercado estableci riba parcela Yanana 14 pa motibo di peliger den trafico. E negoshi aki ta cerca di un birada peligroso, caminda ya caba recientemente casi un desgracia a tuma luga cu un auto cu a trece carga pa e supermercado aki. Nan ta haya e situacion aki un ironia, ya cu e caminda aki cu eventualmente por tabata un caminda priva y cu a wordo financia pa e habitantenan mes tempo di verkaveling, gobierno no ta tende cuenta cu nan preocupacion tog. Ta nan a duna e caminda aki na gobierno pa un cifra simbolico di 1 florin, sino polis no ta bin ora di accidente, pikimento di sushi, etc… E ta e mesun gobierno cu awendia no kier  tene cuenta cu nan reclamo.

 

Tur e inkietud y preocupacion aki a wordo canalisa no solamente na Minister de Meza sino na Minister di Salubridad Publico, pero te ainda e comision di bisiña cu a wordo lanta no a haya niun contesta. E parcela Yanana 14  ta cerca  otro viviendanan cu zonido di hendenan cu ta reuni pafo di e supermercado ta causa molester y un situacion insoportabel cerca varios hende malo cu ta biba hopi cerca di e supermercado aki.

E habitantenan tin varios pregunta cu a wordo formula entre nan na minister Schwengle di Salubridad Publico. Con un supermercado cu a wordo lanta den un cas residencial adapta no solamente como negoshi sino como luga di biba, lo permiti  no solo pa bende bebida alcoholico sino cuminda? Nan no mester di un restaurantvergunning tipo A of B? Nan no mester di un hindervergunning pa opera?

 

Reaccion doño di Chines

Bon Dia Aruba  a bay papia cu e doño di Yanana Supermaket, caminda nos a wordo informa cu nan ta na altura di e situacion cu a surgi cu e bisiñanan. Nan tin un abogado pa atende cu e situacion aki. Igualmente nan a laga sa cu berdad nan a pidi un permiso pa bende bebida; pero e ta take way y no ta asina cu nan lo bin un  bar-supermercado.

 

Nan a laga sa cu berdad tin hende cu den oranan di anochi ta reuni pafo di e negoshi. Pero ta trata di un security guard cu nan tin y cu tin biaha ta haya bishita di amigonan, pero no ta cuestion cu nan ta consumi alcohol pafo di e supermarket. Igualmente nan a nenga rotundamente cu nan a pidi permiso pa bende cuminda of funciona como restaurant tambe.