E porta di mercado laboral a cuminsa habri un tiki mas hancho pa e hendenan cu limitacion -ya sea fisico of mental- cu ta desea di realisa un trabou formalmente.

Lionel Rumnit kende ta job coach na servicio di stichting Trampolin pa Trabou a declara na Bon Dia Aruba cu e mentalidad ta cambiando cerca e dunado di trabou pa acepta persona cu limitacion como parti di nan forsa laboral den nan empresa. “Nan ta mas habri, esey ta sigur”, el a bisa.

E aceptacion di nan den mercado laboral ta bayendo basta bon, pero e por ta miho. Ainda hopi dunado di trabou tin duda pa tuma den nan servicio un trahado cu limitacion. Nan ta pensa cu por ta nan no ta produci suficiente of cu nan ta bay haya gasto extra. Den e caso aki, sr. Rumnit ta bisa e dunado di trabou cu ora nan kier aporta algo na comunidad y nan kier tuma un hende na servicio di nan organisacion, nan por papia cu ne como job coach di e fundacion aki. E ta scucha kico e dunado di trabou kier y asina nan por haya un miho conseho cu por duna contesta na nan expectativanan y dudanan. “E no ta facil, pero tampoco e ta dificil. Si nan tin e pasenshi pa tin un bon combersacion tur cos lo cana bon,” e job coach bisa.

Un chens
Como job coach di e fundacion aki e ta guia e cliente cu limitacion cu e meta cu nan ta bay subi mercado laboral. Recientemente nan tabatin nan open dag y den cuadro di esaki un di nan clientenan a firma su prome contract di trabou cu e compania Daltra Antillas N.V. Pa casi un aña e fundacion aki tabata luchando pa aloca e hoben aki, ya cu e tin un deseo grandi pa traha, y el a demostra esaki den tur forma te hasta bendiendo corant riba caya.

E no tabata haya trabou y tampoco e por haya un chens. Te hasta tin hende cu no a pague pa e trabou cu el a yega di realisa pa nan. Sr. Rumnit a bisa cu varios hende a acerca su persona pa purba di yuda e hoben aki. El a dicidi di papia cu e director di Daltra pa duna e hoben aki un chens, ‘no un trabou’ y lague demostra cu e ta bal esey.

“El a bisa semper: Ami ta bay logra. Y semper e ta bisa mi, si boso ta yudami, mi ta bay leu”, sr. Rumnit a bisa. Pues e hoben aki a demostra cu ta un di e miho trahadonan cu e compania aki tin den nan servicio. No necesariamente pasobra e por haci e trabou bon, pero su motivacion cu ta bini di paden ta inspira y bira un bon ehempel pa su coleganan di trabou. Ora cu e ta sinti cu ta bay bira malo, e ta yama su job coach pa bise cu e ta bay bebe un paracetamol pasobra e no kier bira malo pa bay traha. Te hasta el a yega puntra su hefe di trabou si e mag di traha over time.

E hoben, kende su nomber ta Juan Yarasca ta bisa cu e trabou no ta facil ya cu nan mester traha cu material manera koper, brons, brass, bateria, etc., pero e ta contento pa e confiansa y oportunidad cu e compania aki a dune firmando su prome contract.

“Mi ta masha gradicido cu nan a yuda mi. Pasobra no ta facil pa haya un trabou lihe pa nos cu tin limitacion y problema…” el a bisa. Pero e ta haya cu ‘e berdadero forsa no ta den e musculonan di bo brasanan sino den bo mente.’

Open dag
E obhetivo di e open dag aki tabata pa nan clientenan y nan mayornan, pero tambe otro interesadonan bin wak pa experiencia e trabou cu nan ta realisa. “Pa nan mes por wak con un hende cu limitacion ta traha”, e job coach a bisa.

Pa logra e meta aki nan mester prepara nan clientenan den un ambiente cu ta safe pa nan. Den e caso aki e fundacion aki su sede na Pavia ta brinda nan e ambiente pa nan por siña habilidad nobo. Unabes di un par di tempo cu nan ta ripara cu nan a progresa suficiente y nan ta cla pa bay traha, nan ta wordo hiba afo den otro sitio di trabou pa wak nan ta experiencia pa traha den ambiente laboral di berdad.

Actualmente nan tin 30 cliente, algun di nan ta labora den nan centro pa elabora productonan di Aruba Ginger, tambe di e marca Ha’ bon y otronan trabou chikito. Tambe otro grupo ta labora externo. Un bus ta busca nan y ta trece nan den oranan di merdia. E job coach aki ta evalua cada cliente pa wak nan talento pa realisa cierto tipo di trabou y asina yude pa desaroya mas.

“Nos ta purba train nan den cierto cosnan cu ora cu nan ta bay traha nan no ta haya sorpresa”, el a bisa. Den esey tin un balans entre loke nan kier y loke nan por. Unabes cu e job coach aki tin un idea di kico nan cliente kier y kico nan por, e ta bay bati e porta di un dunado di trabou. Logicamente ta depende kico e dunado di trabou kier of mester, e fundacion aki ta aloca su cliente cu ne.

No solamente nan ta siña con pa traha cu cierto instrumentonan, sino con nan por anda cu conflicto y con nan por cera amistad nobo den nan trabou. Tambe procedura con nan ta meld ziek, ya cu nan ta parti di e procedura laboral cu nan mester sa tambe.