Dunadonan di trabao mester tin mas confiansa den DPL

Durante ultimo lunanan y tambe aña a bin ta wak tambe cu dunadonan tin trabao ainda ta opta pa publica nan vacaturanan den corant y no trece directamente na DPL. Esaki ta nifica cu parti di dunadonan di trabao ainda no tin e confiansa pa DPL yuda nan haya un trahado y ta prefera di haci nan mesun buscamento y seleccion pa haya trahado via corant, segun vocero di DPL, Richinel Stamper.

Di un otro banda DPL ta ofrece e servicio aki caminda cu si ta trece e vacatura eynan, nan ta bay haci un pre screenmento di e candidatonan y a base di un cita ta bay e ora manda hende cu segun screenmento ta capacita pa e trabao. E servicio ta gratis y a bay ta promoviendo na comienso di e aña aki na tur dunado di trabao na Aruba.

Establece contacto

DPL a habri aña ta traha fuerte pa cera mas contacto cu doñonan di trabao, pasobra ta logico pa tin un bon relacion cu dunadonan di trabao, nan no tin vacatura pa ofrece na buscadonan di trabao. Meta di DPL ta pa yuda e gruponan aki yega na otro, pero e manera pa yega na otro ta, a base di vacaturanan cu ta wordo poni disponibel. Actualmente DPL ta trahando riba un lista di dunadonan di trabao y nan representantenan pa asina ey cuminsa acerca nan pa por yega na mas vacatura pa asina ey por aloca mas hopi hende posibel na trabao den 2016.

Pa e proyecto ey ta sacando un carta directo na tur dunado di trabao caminda cu ta brinda nan e servicio, mustra nan riba kico tur esaki ta encera y tambe e datonan di contacto, caminda cu por tuma contacto cu DPL.

Trabao tin

Trabao tin sigur, Stamper a enfatisa, pero cada hende ta propaganda esey riba nan mes. Esey ta pone cu DPL no tin bista completo riba kico e trabao ta encera por ehempel of e detayenan, cual ta haci dificil pa manda hende bay solicita. DPL no ta pro pa traha riba e aspecto por ehempel di aplicacion, pero si cu un solicitud.

DPL ta prefera semper pa un hende haya un entrevista y no simplemente yena un papel y warda pa un yamada despues.

Pa por haci un solicitud pa e hende wordo entrevista, mester tin e detayenan di e vacatura y esey no ta haya den corant, sino e dunado di trabao mester trece e vacatura na DPL y laga yud’e pa haya e empleadonan. Den sistema di DPL tin persona cu ta dispuesto pa haci tur tipo di trabao y p’esey hopi biaha ta bisa na dunadonan di trabao, en bes di pone den corant, caminda cu tin gasto envolvi pa publicacion, trece na DPL, nan mes ta publica esey riba nan lista, nan mes ta haci e screenmento di e hendenan cu ta desea y manda nan a base di un cita cerca e dunado di trabao pa un entrevista, segun Stamper.

Uzo di DPL

A puntra Stamper si tin un ley cu ta obliga nan haci uzo di DPL su servicionan pa ora ta busca un hende pa traha of si esaki ta obligatorio ora ta trata di stranhero so.

E ta splica cu un ley no tin riba esaki. Cada dunado di trabao ta opta pa haci’e na su manera. Tin algun si cu ta acera y bisa cu tin mester di hende pa tal ramo of den tal funcion. E unico momento cu ta obligatorio pa un dunado di trabao pone un vacatura na DPL ta na momento cu e ta bay pidi un peticion di permiso pa un persona stranhero traha den su compania. Na e momento ey, e ora e ta bira cu a base di e maneho di labor cu Minister di Labor den e caso aki ta stipula, ta bisa cu e compania mester pone un vacatura disponibel na Job Center, pa asina Job Center por screen pa 4 siman largo si no tin ningun local disponibel pa por haci e trabao prome cu bay over na haci un peticion pa un stranhero por haya un permiso di trabao.

Na momento cu e bay pidi pa un prome permiso of un renobacion di un permiso di un hende cu ta traha pe, cu ta stranhero, e ora si e ta obligatorio pa pone vacatura na DPL, pa screen e mercado laboral local, pa wak si en berdad ta sigur cu no tin ningun Arubiano of local den e caso aki disponibel pa haci e trabao. Si resulta cu esey ta e caso, e ora tin diferente punto den e maneho tambe, caminda cu ta bay nenga e peticion cu el a haci pa e stranhero of pa renobacion of pa prome permiso.

Contacto

Enfocando riba vacatura, pa informacion di vacatura por yama e number central cu ta 5215555, pero tin un persona cu ta traha unicamente cu e parti di vacatura aki, cu ta den e caso aki 5215502. Esey ta e number cu cualkier dunado di trabao cu ta interesa, por yama pa asina haya e informacionnan necesario pa pone un vacatura gratis na DPL caminda cu nan mes lo bay publica esaki den corant riba nan lista y manda candidatonan cu a wordo gescreen caba via un afspraak na e compania, Stamper ta finalisa.