No a logra baha e gasto di cuido di AZV cu 5 miyon pa luna na 2020 y mas tarda cu ehecucion di e asina five way model, mas leu lo ta cu cumpli cu e rekisito pa baha e gasto di AZV. Un di e elementonan principal di AZV den su modelo pa baha gasta ta cay den e ley di AZV y ta Gobierno mester haci e cambionan.

Ta trata e contribucion propio di 5 florin pa cada regla di receta; un contribucion propio di 1 florin pa cada test di laboratorio; un contribucion propio di 5 florin pa tratamento di fisioterapia; un contribucion propio di 10 florin pa cada consulta cu specialista, tanto pa esnan cu ta den servicio di salario di Hospital of ta riba nan mes; e derecho riba ortodoncia (beugel) ta desaparece (cu excepcion); cuido di boca riba 18 aña ta cay afo (cu excepcion); medionan di cuido personal ya no ta keda cubri (cu excepcion); registracion di remedinan ta conforme Europa y mester di un decreto ministerial pa importacion habri.

Pero, Minister di Finanzas a bisa e siman aki cu ta spera cu Gobierno di Hulanda por compronde cu e pasonan cu ta exigi ta hopi pisa y a pidi pa pospone e decision di introduci entre otro e contribucion propio.

Cambionan mara na ley

Solange Tchong, vocero di AZV a bisa cu a internamente a haci e ehercicionan necesario, y cu pa e motibo ey a bin cu e five-way model pa cumpli cu e exigencia di Hulanda. AZV a corta gasto unda tabata por, pero e aspecto cu mas lo a contribui na e reduccion di gasto ta e di tres ‘ola,’ cu ta inclui e contribucionnan propio. Pero tur ta mara na ley y esey ta keda tarea di Gobierno.

Pa loke ta e lista positivo di remedi, esey ta otro ley cu AZV ta traha cune, pero no ta e organo ehecutivo ta determina esaki. E lista tambe ta basa riba ley.

No a logra e reduccion di 5 miyon pa luna

Como tal, Tchong no por bisa si e decision aki pa pospone e cambionan di ley pa entre otro introduci e contribucion propio lo tin mas efecto a lo largo pa AZV, mirando cu no a logra e reduccion di 5 miyon florin pa luna. Cuanto a logra reduci, e vocero no por a bisa, pasobra ta na e momentonan aki ta acumulando e datonan specifico. Unabes cu e informacion ta obtenibel lo informa comunidad.

Pero AZV en todo caso, lo sigui haci su esfuersonan pa reduci mas gasto posibel sin cu esaki ta afecta e cuido medico en general.

Sector ta uni

E reduccion di gasto lo afecta henter e sector di cuido, for di dokter te na boticarionan. Y e gruponan aki a uni den un Comision Nacional.

E Comision Nacional di Sector di Cuido sinembargo no ta mira cu e tin un papel den e reduccion di gasto aki. Por lo menos, no directamente. Segun Ronald van Trigt, kende ta encabesa e Comision, e tarea no ta pa yuda reduci e gasto cu Hulanda kier pa AZV, sino pa mehora e colaboracion den e sector di cuido y medico na Aruba en general.

Dialogo a inicia

Locual e Comision Nacional ta opta p’e ta pa tur e dunadonan di cuido haci palabracion interno pa na forma structural baha gasto of haci e cuido mas eficiente. Esey ta e obhetivo di e Comision. “Nos trabao no ta pa busca e reduccion di 60 miyon den gasto di AZV. Esey ta un tarea di AZV y Gobierno. Nos comision ta djis riba eficiencia y con pa economisa.”

Den otro palabra, e Comision Nacional en cuestion ta enfoca unicamente riba con pa mehora e colaboracion entre partnernan y bira mas eficiente den costo.

Na e momentonan aki e Comision no ta un partner den ehecucion di e landspakket, Van Trigt a bisa.

A tene e prome encuentronan, pero a palabra cu e sector di cuido, cu pa awor no lo divulga e temanan specifico, ni e conclusionnan di cada reunion, pa asina permiti cu por dialoga ampliamente. “Di e forma aki por hiba un dialogo trankil. Tin e combersacionnan, pero nos no ta bay bisa awor con e proceso mes ta bayendo.”

Inversion grandi den sector medico na Aruba

En todo caso, e sector ta convenci cu Aruba mester por keda para fuerte den e servicio medico cu ta brinda. E landspakket por ehempel ta menciona cu mester bin colaboracion entre e hospitalnan den region Caribense den Reino Hulandes, pa asina crea specialisacion y baha e necesidad pa manda pacientnan pa Colombia.

Pero na Aruba ya caba a haci hopi inversion pa amplia e oferta di specialisacion. Tin hopi inversion cu a tuma luga na Aruba caba. Esey ta locual ta bay pone riba papel pa bay defende e aspectonan aki. “Tin cosnan hopi importante a sosode na Aruba. Tin e radio therapie y e specialisacion den operacion di wowo na IMSAN cu ta adelanto grandi,” segun van Trigt.