E fin di siman aki e dump na Tamarijn/Seroe Lopes tabata na candela atrobe. Nos a compronde esaki for di un di e habitantenan Luc Alofs.
El a post algun potret riba su pagina di Facebook anunciando cu lo tin un conferencia di prensa e siman aki pa trata cu e asunto aki y brinda mas informacion.
Den luna di april tabata tin un candela basta grandi riba un dump priva na Tamarijn cu a core cu hopi habitante den e area. E huma tabata un molester grandi pa e bario y habitantenan cu no tabata por mas cu e situacion. Riba nos pagina di Facebook Bon Dia 24, nos a publica un video tambe e tempo ey unda ta mustra con tabata tin hasta un confrontacion cu casi a bay for di man entre e yiu di doño di e dump anto algun habitante. E candela aki a causa cu algun habitante mester a bay drumi otro caminda, como tambe scolnan den e bisindario cu mester a cera pa algun dia pa via di e contaminacion di e huma.
Candela atrobe
E fin di siman aki atrobe e dump aki tabata na candela. Huma a sali henter merdia for di tera segun e habitante ta ilustra. “Despues di dos luna y mei practicamente nada a sosode. Gran parti di e dump no ta cera manera priminti door di minister. Problema: ken tin cu paga p’e? Ministerio Publico no a ricibi rapport di polis. Polis ta understaffed?” Esaki sr. Alofs a comenta agregando cu e holor keto bay ta masha vies, drentando den nan casnan causando problema di garganta y hopi mas. E huma probablemente ta toxico tambe, cual a wordo treci pa dilanti den luna di april.
Manera Bon Dia Aruba a publica nos tambe a puntra varios biaha con ta para cu e caso civil di e habitantenan contra e doño di e dump. E unico cos cu sr. Alofs kier a bisa nos ta cu e abogadonan ta negociando riba e caso y asina purba di no yega asina leu na corte. Awor cu e situacion no a resolve, nos lo acerca e habitantenan atrobe pa wak si nan lo sigui cu nan caso.
