Ayera nochi por a tuma nota cu dump na Parkietenbos un biaha mas tabata na candela. E aña aki ariba diferente ocasion dump tabata na candela y e problema aki ta keda un molester pa bario di Parkietenbos.
Apesar cu Minister di Transporte, Integridad, Naturalesa y Asunto di Adultonan Mayor, Ursell Arends, a anuncia cu dia 31 di december lo ta e ultimo dia cu dump lo ta habri pa publico, e sushi lo sigui eynan y pues esaki lo por sigui pega na candela den futuro.
Pa loke ta e funcion di dump despues di su cierre, Minister Arends a splica na reportero di Bon Dia na principio di december cu den su vision lo transforma e dump den un Parke Solar, pero e proceso di analisis y evaluacion ta andando. “E proceso di analisis cu ta andando ta pa fiha cual ta e miho forma y esun mas sigur pa tanto hende como naturalesa y medio ambiente. Esaki tambe lo bay via un openbare aanbesteding pa e forma. Mester analisa cada estudio debidamente pa asina por scoge un solucion duradero y pagabel”, el a bisa.
Manera a splica anteriormente, pa loke ta e otro tiponan di desperdicio – comercial -, Minister Arends a splica cu esaki nan lo ser dirigi na diferente compania cu lo percura pa procesa esakinan. cua compania y cua tipo di desperdicio lo ser presenta proximamente den un “blue print” pa asina e ciudadano por sa precisamente kico ta su opcionnan.
