Segun fuente You, Me, and BTC, e whitepaper tras di e moneda criptografico Petro cual gobierno Bolivariano di Venezuela a anuncia luna pasa ta mustra e realidad di e cripto moneda Venezolano respalda pa reservanan di crudo, oro, gas y diamantenan di e pais cu te awo, no ta disponibel riba mercado.

Despues di algun tempo ta purba haya e whitepaper cual ta un documento cu ta splica e aspectonan tecnico pero tambe strategia financiero di e cripto moneda You, Me, and BTC a haya esaki despues cu aparentemente varios versionnan falso a wordo saca.

E moneda aki cual presidente di Venezuela Nicolás Maduro a anuncia den cuminsamento di december lo ta e gobierno su solucion pa trece stabilidad financiero bek den e pais.

Manera varios fuentenan a raporta, ta bay purba bende un cantidad di monedanan pa inversionistanan den un asina yama Initial Coin Offering (ICO). Despues di a ricibi basta critica di parti di oposicion cual no a aproba Petro gobierno di Venezuela a anula e decision aki por medio di Asamblea Constituyente.

 ‘Un moneda virtual respalda pa recursonan di Venezuela no ta klop’
E discusion cu a surgi riba You, Me, and BTC a toca e plan financiero cu ta delinea den e whitepaper cual segun e fuente no ta klop. E gobierno di Venezuela lo a encarga un fundacion pa desaroya e moneda, pero no a pone personanan cu experticio den e team encarga cu esaki. Loke e fuente por a determina ta cu ‘basicamente a copia open source code y cambia solamente e branding’ asocia cu e tecnologia.

Un persona cu experiencia den area di cripto monedanan, Eduardo Gómez kende ta head of support na purse.io ta conta cu den su experiencia cu su pais, Petro no por wordo confia. “Nan kier colecta placa riba e recursonan natural cu Venezuela tin.” Pero e recursonan aki segun sr. Gómez no por wordo extrai pasobra no tin suficiente infrastructura ni tecnologia na e pais bisiña pa haci esaki. “E supuesto azeta y otro recursonan cu ta e respaldo pa e moneda aki no por wordo extrai actualmente pasobra e ta crudo pisa. Ni na Merca nan tin e tecnologia pa extrai esaki. P’esey pa mi e no ta klop con gobierno Venezolano kier bay bende recursonan cu no ta ni existi, segun sr. Gómez.

Es mas, sr. Gómez a trece dilanti cu e compania estatal di crudo PDVSA den un plaso di 10 aña a sa di hisa e cantidad di trahado na e compania casi 10 biaha di loke e tabata antes mientras e produccion di azeta a baha cu 40%. “Mi no ta kere ta inteligente pa confia un compania asina.”

Petro no lo ta disponibel
Aunke den mundo di Bitcoin speculacion ta un gran parti di e mercado di intercambio, e fuente ta subraya cu ta trata di plataformanan habri na cual tur hende tin acceso na dje. P’esey tin critica pisa ta cay pa e moneda vitrual cu respalda pa crudo cu segun e fuente ta purba bende e moneda aki pa asina purba haya confiansa bek di inversionistanan mientras e regimen ta cera su hendenan cual ta muriendo di hamber.

Es mas, e echo cu e benta di Petro  lo no ta disponibel pa wordo cumpra den bolivares solamente den Dollars Mericano of otro cripto monedanan manera Bitcoin ta un punto cu ta trece masha hopi duda pa e moneda virtual respalda pa crudo. Segun David Gonzalez kende tambe tabata envolvi den discusion di e whitepaper di Petro, lo a ta hopi miho si tabata haci Petro disponibel na ciudadanonan a cambio di bolivares. “Pasobra e realidad ta cu un moneda virtual na Venezuela ta hopi necesario mirando e situacion economico. Pero no ta e gobierno cu lo mester haya acceso na fondonan, si no e hendenan mes.”

Pero e moneda aki no lo ta disponibel pa wordo intercambia cu bolivares, aunke sea den e fase inicial di benta.

Diferente aspecto pa considera
Di punto di bista di inversionista, nos a papia cu hoben Andrew Rasmijn un inversionista den diferente proyectonan relaciona cu cripto monedanan  kende tambe a expresa su dudanan pa inverti den un cripto moneda conecta na e pais Bolivariano. “Ta importante pa nota cu personanan na Venezuela no tin acceso regular na computer ni internet, cual kiermen cu nan acceso na tecnologia di blockchain ta limita. Pero mi no ta kere Venezuela mes tin hopi placa inverti den dje. Podise hende rico si, pero nan lo por manipula esaki.”

Pa loke ta trata e banda di inversion, sr. Rasmijn ta subraya cu ta importante pa considera si un proyecto lo sigui crece y hende lo sigui inverti den esaki. ‘Den e caso aki mi no ta mira cu esaki lo bay pasa personalmente’, sr. Rasmijn a expresa.

Sinembargo sr. Rasmijn ta mira e posibilidad pa e comunidad tambe. “Si e wordo haci disponibel riba intercambionan riba internet hende lo por uza esaki pa manda placa pa familiarnan na Venezuela por ehempel. Si e por haci un diferencia pa personanan den Venezuela e ora ey esey ta interesante.”

Alabes e hoben ta subraya cu tin di considera si e network cu e moneda lo opera riba dje lo ta centralisa of descentralisa. Esaki ta importante segun sr. Rasmijn pasobra despues di e ICO si e gobierno tin control (centralisa) di e monedanan, nan lo por bende un porcion grandi di esaki y haci loke nan kier cu ne.