Quanten Consortium Aruba LLC su headquarter ta un record shop di K-Pop segun Google Maps

Quanten Consortium Aruba LLC, compania cu tin interes di inverti 3.5 biyon dollar na Aruba, a gana un contract na Angola di otro 3.5 biyon dollar. Nan tambe ta luchando pa gana e destaho pa habri e refineria di Trinidad and Tobago bao e nomber di e compania principal Quanten LLC cu un inversion di 7 biyon dollar. Pero segun Google Maps, su headquarter ta un record shop y su sede na Angola ta un warehouse.

Tabata januari di aña 2021 ora gobierno di Aruba, por medio di un comunicado, a informa cu companianan Eagle LNG y Quanten Consortium Aruba LLC a firma cu Refineria di Aruba (RdA) pa sigui cu negociacionnan pa asina mira si ta yega na acuerdonan pa Quanten LLC di su banda traha riba e reapertura di e refineria y Eagle LNG riba un proceso y desaroyo nobo.

Den comunicado a señala cu diahuebs 14 di januari 2021 tabata un dia grandi pa motibo cu a tuma luga e firmamento di acuerdo “Letter of Exclusivity” entre RdA y Eagle LNG pa desaroya un facilidad di gas na Aruba/San Nicolas. Prome Minister Evelyn Wever-Croes a expresa cu e momento ey tabata grandi pa Aruba, cual lo trece desaroyo economico, crea cupo di trabao y genera divisas.

Dia 15 di april di 2021, prome minister Evelyn Wever-Croes a publica riba su red social Facebook e noticia cu e siman ey el a reuni cu Jeff Meyers, CEO Quanten Consortium Aruba LLC (QCA), Karl Welch VP Quanten Consortium Aruba LLC (QCA), Dr. Segun Thomas, Managing Partner Quanten Consortium Aruba LLC(QCA).

“Esakinan ta algun di e partners den e consorcio cu ta negociando tocante reapertura di e refineria. Nan tin hopi interes den e refineria. Nan lo cambia e refineria y hacie uno moderno y mas limpi. Esaki ta pas den nos vision. Den 4 pa 5 siman nos lo haya sa si ta un GO of un NO GO”.

Te awe, dia 6 di juni di 2022, un aña despues, comunidad no tin conocemento si e acuerdo aki na Aruba a bay door si of no.

Bon Dia Aruba a haci un investigacion riba e compania Quanten Consortium Aruba LLC cu a priminti di hinca 3.5 biyon dollar pa e proyecto aki. Nan ta indica cu lo nan bay rehabilita, actualisa, opera y transforma di un manera sostenibel e refineria di Aruba pa asina ey refina 235.000 bari di petroleo pa dia cu opcion pa expande te cu 350.000 bari di petroleo pa dia, tur esakinan di manera ‘Carbon Neutral Operation’.

Segun Quanten LLC su website, nan tin 125 aña di experiencia cu proyectonan grandi na Hapon, China, Merca, Europa, India, Africa y incluyendo nos hermana isla di Corsou.

Bon Dia Aruba continuando cu su investigacion a mira cu Quanten LLC a wordo funda aña 1998, na San Jose, California, Merca; akinan caba por mira cu tin un discrepancia cu e informacion anterior tocante nan 125 aña di experiencia y segun nan website mes ta señala, nan tin un capacidad di entre 11 pa 50 trahadonan.

Jeff Meyers hunto cu su ruman ta specialista den area di energia, ofreciendo nan servicionan pa proyectonan comercial y industrial unda cu nan ta miembro y fundado di Quanten LLC conhuntamente cu Quanten Electrical Contractor Inc, Quanten Consortium Aruba LLC (QCA) y Quanten Consortium Angola LLC; e dos ultimo compania aki a wordo registra pa e mesun agente y cu e mesun adres 16506 Scenic Peacks Ct, cu ta un cas na Texas, Merca.

Sinembargo, riba e website di Quanten LLC Aruba ta indica cu nan adres ta na 1161-70 Ringwood Court, CA 95131 na San Jose, California, Merca, unda cu ta mustra cu e headquarter ta un libreria y un record shop bao e nomber di ‘KloudK-Pop’ y esun di y Quanten Consortium Angola LLC ta ubica 50 meter leu di dje, segun e adres ta indica.

Di loke ta trata Angola, nan tambe a gana e destaho publico pa construi un refineria cu 100.000 bari di petroleo pa dia, segun rapport di Oil and Gas Journal, cu fecha di maart di aña 2021, e rapport ta señala cu hunto cu e construccion di e refineria aki nan lo tin e flexibilidad pa procesa productonan final di petroleo como gasolin, diesel y combustibel pa avion.

Ademas di e construccion y diseño di un infrastructura asocia cu un planta di coriente, awa potabel, tratamento di awanan manera Bubali Plas unda cu su desaroyo tin fecha pa aña 2024 cu un inversion di 3.5 biyon dollar y a wordo registra na un adres cerca di Quanten Consortium Aruba LLC.

Di otro banda, a keda conoci cu Quanten LLC tambe ta haciendo un oferta pa opera refineria di Trinidad and Tobago ‘Pointe-a-Pierre’ cu un inversion di 7 biyon dollar, unda cu senador di oposicion, Wade Mark siman pasa a trece dilanti su preocupacion tocante esaki y a pidi un aclaracion na gobierno di Trinidad and Tobago. E ta manifesta cu e compania ta bay haci un inversion asina grandi y nan adres ta registra na un simpel cas na Texas, manera e website www.trinidadexpress.com ta señala.

“Sikiera pa nan nenga cu no ta berdad. Bisa na Trinidad and Tobago cu esaki no ta nan oficina. Nos kier un aclaracion di Gobierno pasobra nan no a pronuncia riba esaki ainda. E supuesto compania aki ta cerca di ricibi e funcion y responsabilidad di opera nos refineria di 7 biyon dollar”, Mark a bisa.

Preguntanan ta bin dilanti unda cu e mesun compania aki a firma un acuerdo cu Gobierno di Aruba cu e proposicion di rehabilita, actualisa, opera y transforma di un manera sostenibel e refineria di Aruba, pero cu te ainda comunidad no a mira un desaroyo den esaki for di aña pasa.