Den declaracion duna recientemente, confronta cu pregunta di prensa, prome ministro ta bisa cu e ta convenci cu Citgo lo logra haya e financiamento pa por inicia e rehabilitacion di e refineria na San Nicolas. Esey no ta zona malo, pero e splicacion cu e ta duna despues ta haci esnan bon informa bira mas nervioso ainda. Y pakico su palabranan no ta convence? Nos lo purba splica.
Pa cuminsa, mescos su colega di energia, prome ministro tampoco ta haci e distincion entre e diferente Citgo-nan, y ta keda hunga wega di tapa tur cos bao di un nomber. No pa prome biaha, y no e ultimo tampoco, nos ta purba clarifica pa contraresta e tipo di malinformacion intencional di banda di gobierno. No ta trata di pinta e situacion mas scur cu e mester ta, pero ta bon pa pueblo ta bon informa ken ta ken, y con nan ta para den e wega aki.
E Citgo na cual PM ta referi, ta e Citgo ‘original’: Citgo Petroleum Corporation LLC, na Houston , Texas. Esaki ta e compania cu tin propiedad, cu lo por a financia o fia placa pa haci e rehabilitacion na e refineria na Aruba. E compania tin tres refineria, un red extenso di pomp di gasolin y instalacion di almacenahe. Lamentablemente den e ultimo añanan su posicion financiero a keda seriamente mina pa sumanan grandi cu e compania mester a fia, pa pasa un gran parti como dividendo na PDVSA (y gobierno Venezolano), via e dos companianan holding cu tin entre Citgo y PDVSA. Den e prestamonan haci, a duna garantia na e fiadonan cu Citgo lo no tuma mas debe riba dje, sin cu esaki lo tin reaccion di parti di e fiadonan, cu hasta por yega na demanda propiedad di Citgo, por ehemplo di accion (shares) den e compania.
Ta p’esey a crea un compania nobo na februari di e aña aki, Citgo Aruba Holding LLC, cu ta doño di e accionnan den e companianan di nomber Citgo, lanta na Aruba como NV local. E mas importante di nan awor ta Citgo Aruba Refining NV, cu ta esun cu lo opera e upgrader ora e rehabilitacion termina. E propietario di e holding aki ta PDV Holding LLC, cu ta propiedad na su turno di PDVSA. PDV Holding, via Citgo Holding LLC, ta propietario di Citgo Petroleum tambe. Y pakico tur e maniobranan aki? Pa e simpel motibo cu NO por involucra e Citgo ‘original’ den henter e asunto aki, pa nan no haya nan den problema cu e acreedornan di e debenan cu nan tin caba.
Citgo ‘original’ un dia despues di e famoso acuerdo firma na Palacio Miraflores, a saca un press release pa duna di conoce na henter e mundo petrolero y financista, cu nan NO ta envolvi directamente den e proyecto aki, pero solamente ta duna asistencia tecnico y conseho. Tambe nan a señala, pa tur claridad, cu lo mester busca fondo externo pa financia e proyecto aki. Den noticia internacional a sali awor cu Citgo lo a pidi PDVSA 100 miyon dollar, pero muy probablemente lo ta e holding (Citgo Holding LLC) lo a haci esaki, pa por canalisa e placa pa e holding Citgo Aruba Holding LLC y pa e compania cu ta opera na Aruba.
Awor atencion pa e situacion manera cu e ta awe. E presion riba PDVSA pa yega na inicia y pone den operacion e proyecto na Aruba a bira mas grandi. Esey pasobra ta bastante probabel cu nan ta bay perde e posibilidad di refina y upgrade crudo na Curaçao na 2019. Banda di e refinacion e aña aki, en bista di e problemanan pa drenta crudo liviano na Venezuela, un gran parti di e crudo cumpra riba mercado internacional ta bay Curaçao, unda a cuminsa caba cu e proceso di upgrade y ‘blend’ (mezcla) crudo pisa di Orinoco cu crudo liviano. Si acaso PDVSA no tabatin pura pa cuminsa lihe na Aruba, awor nan a haya un motibo mas…
Pero cu esey no necesariamente e situacion financiero a drecha. A pasa henter e asunto pa Citgo pasobra PDVSA no tabata mira con nan mes mester bay handle e asunto. Awor esunnan cu supuestamente mester por a yega na placa (fia), ta bira puntra esun cu no tin nada, si e por pone e prome 100 miyon riba mesa… anto ripiti esaki seis biaha mas… Esaki ta e berdadero background di e asunto cu lo mester haya un solucion. Ta keda un pregunta si den tur e problemanan di PDVSA, cu ta raspando bom di caha di placa pa evita un default riba su debenan biyonario, y ta keda sin paga un cantidad di creditor na Venezuela y den exterior, nan ta mira un posibilidad pa pone e proceso na Aruba cana cu e prome pago di 100 miyon.
Hopi ta depende di e oferta di cambia bono cu ta madura otro aña, pa bono cu ta bira pagabel na 2020. Esey por trece un alivio momentaneo cu por faborece e start up na Aruba tambe. Nos lo keda pendiente!
