Duda den parlamento tocante continuacion di experimento di cannabis regula

(NLTimes) – E experimento pa bende cannabis produci legalmente den coffeeshop na 10 municipalidad ta ser topa cu hopi resistencia den Tweede Kamer, parti di parlamento Hulandes.

E experimento a cuminsa na fin di aña pasa, despues cu a propone esaki varios biaha y a ser trata na Den Haag pa mas di 10 aña. Tin tiki entusiasmo pa e testnan den e Kamer nobo. E partido mas grandi, PVV, te hasta kier pone un pausa riba esaki te ora cu yega un acuerdo pa un coalicion nobo. Te ainda no ta cla si suficiente partido ta sostene e proposicion aki.

E debate parlamentario tabata tocante e pregunta si e experimento di cannabis mester ser amplia pa inclui e districto di Amsterdam Oost. Partidonan Cristian ChristenUnie, SGP, CDA ademas di PVV no ta entusiastico tocante e experimento, mucho menos tocante expande esaki.

“No aña pasa, no awe, no mañan, no experimento cu nos hubentud,’ Rene claassen di PVV a bisa ora di papia tocante su posicion. Ki señal nos kier manda como gobierno; cu uso di droga ta normal of cu nos mester biba saludabel y crece saludabel?” Danielle Jansen di NSC tambe tin reservacionnan “serio” tocante e plan pa expande e experimento di cannabis. Sinembargo, te ainda e no kier tuma un posicion manera sostene PVV su plan di pone un pausa riba esaki. “Mi lo trata esaki cu mi fraccion,” el a comenta.

GroenLinks-PvdA, D66 y VVD ta sostene e experimento di cannabis. Ingrid Michon di VVD sinembargo si tin duda tocante expande esaki na Amsterdam Oost. E tin preocupacion cu e consecuencianan di provee cannabis legalmente na un parti di e capital y no toronan. “E no ta un secreto cu nos ta mira e experimento aki como un paso importante den direccion di legalisacion y miho regulacion di e cadena di coffeeshop,” Joost Sneller di D66 a bisa. E ta prefera pa e gobierno tin bista tocante con cannabis ta produci pa esaki por pasa responsablemente. Tambe e tin speransa cu esaki lo yuda reduci crimen.

E experimento mester demostra si e legalisacion di produccion di cannabis tin e beneficionan aki, Michon a comenta. E kier tuma “decisionnan basa riba hecho” cu e experimento aki. E ta kere cu e personanan of fraccionnan den contra di e experimento aki ta demasiado estricto y ta basa nan opinion “riba creencia.”