DUCAPRO y asociacion ABA no a yega na un acuerdo

Manera ta conoci desde 1 di januari di e aña aki DUCAPRO a anuncia cu cualkier compania of persona cu haci uso comercial di musica tin cu paga pa e derecho pa haci esaki. E noticia aki a trece hopi discusion y pa motibo di esaki DUCAPRO a lanta un caso contra e radio emisora 100.9-Hits100FM (Q-Waves N.V.) pasobra e radio emisora no kier paga e suma mensual cu ta ser rekeri pa por haya e derecho pa toca musica tur luna.

Den luna di februari DUCAPRO y Q-Waves N.V. tabata den corte na unda ambos partido a presenta nan argumentacionnan pakico si of pakico no mester cumpli cu e pago mensual cu DUCAPRO ta pidi pa por ricibi e derecho pa toca musica tur luna.

Na final di e tratamento di e caso, despues di a scucha ambos partido, hues a ratifica cu e radio emisora en cuestion, y tur otro cu kier haci uso comercial di musica, mester paga pa por haya e derecho pa toca musica di autornan local y internacional. Loke a keda pendiente pa establece tabata cuanto e suma aki ta bay bira.

Hues a sugeri e ora pa e partidonan sinta na mesa pa asina hiba un negociacion y yega na un acuerdo, cual ambos partido a bisa cu nan ta dispuesto pa haci. Mientras cu negociacion tabata andando, hues a puntra abogado di DUCAPRO si e radio emisora por paga un suma mas abao di loke nan ta pidi.

E doño di e radio emisora a indica na hues cu nan ta dispuesto pa paga 250 florin pa luna, cual e abogado di DUCAPRO a rechasa indicando cu e suma ta demasiado abao.

Hues e ora, riba peticion di abogado di DUCAPRO, a determina un periodo di dos luna pa e partidonan sinta na mesa y negosha un tarifa aceptabel pa ambos.

Segun noticiero local, Noticia Cla, a informa ayera, e caso entre DUCAPRO y asociacion ABA a continua ayera mainta den corte mirando cu e deadline cu hues a pone, 24 di april, a vence y e partidonan no a yega na un acuerdo.

Segun e noticiero a indica hues lo haci un intento mas pa wak si e partidonan por yega na un acuerdo, pero si esaki no resulta, hues mes lo tin cu dicta un sentencia den cual e ta esun cu ta bay determina e suma cu e radio emisoranan mester paga DUCAPRO.