Duaneronan a dicidi pone un pauze na nan presion; Gobierno a invita SADA pa reuni den Conseho di Minister

Ayera mainta, Sindicato di Duana di Aruba (SADA) a convoca un conferencia di prensa di caracter di urgencia, despues cu nan a haya un invitacion di parti di gobierno pa reuni diabierna proximo.

Presidente di SADA, Edward Maduro ta kere cu gobierno finalmente a dicidi di sinta cu e duaneronan, mirando e presion cu ta biniendo di parti di e miembronan di SADA. P’esey nan a dicidi di tuma un pauze breve entrante otro siman den espera di e resultado di e reunion di diabierna dia 25 di october awor.

E presion ta birando mas pisa pa gobierno keto bay. El a referi cu siman pasa nan colega di polis, representa pa SPA, a bay den accion pa loke ta trata asunto di indexering.

Igualmente sindicato SIMAR tabatin un reunion general cu e maestronan, unda nan a wordo informa tambe riba e situacion di indexering, cu nan ta bin discutiendo cu gobierno varios luna caba. E siman aki SADA tambe tabatin un reunion interno cu su miembronan pa trata e mesun tema di indexering.

Maduro a reitera cu a pesar di tur intento pa nan por yega na un solucion a base di dialogo sinta na mesa y di forma responsabel, nan mester a informa na nan miembronan cu nan no ta hayando oido ni respet di parti di gobierno. E plan ta di sigui implementa nan accion, ya cu no ta biniendo niun sorto di proposicion di gobierno pa bin cu un indexering di 3.6% ahusta na e costo di bida di 2018. Maduro a bisa cu loke nan ta pidiendo ta un compensacion husto di nan salario conforme na inflacion.

Sinembargo, ayera nan a haya un invitacion di parti di gobierno pa bay sinta otro siman na conseho di minister, unda pleno gabinete Wever-Croes ta bay presenta un proposicion di nan banda.

Maduro a laga sa cu no tabata necesario di parti di gobierno pa sindicatonan a pone presion, pero SADA ta considera cu tabata necesario mirando cu gobierno no tabata duna e debido atencion na nan. Maduro ta haya cu na final, gobierno ta keda responsabel di e situacion cu a presenta durante e ultimo dianan, ya cu como sindicato nan a haci lo miho pa haya un solucion.

Considerando e invitacion cu gobierno a haci pa sinta na mesa cu SADA, y no obstante cu SIMAR a haya un mandato di su miembronan pa bay den accion, SADA a dicidi di bin cu un pausa. E duaneronan a tuma e decision di keda na spera di locual ta bay sosode diabierna dia 25 di october. Nan ta bay warda e resultado di e reunion cu nan lo sostene cu Conseho di Minister y e proposicion cu lo bin ariba mesa relaciona cu ahuste di salario.