Despues di e accion di tres ora cu personal di aduana a realisa dilanti di aeropuerto pa expresa nan disgusto cu e instalacion di e huurdonan di auto ( car rental) den sala di yegada di e terminal aereo aki, nan a reuni cu minister.

Na e reunion tabata presente sindicato SADA hunto cu e minister di Financia, Angel Bermudez. E duaneronan ta contra e companianan pa bin den aeropuerto pa motibo di siguridad.  Nan ta haya cu e area aki ta hopi clave pa nan por realisa nan trabou di control debidamente y safe.

For di diabierna, miembronan di SADA a dicidi di warda un rato cu nan accion, ya cu e carta cu nan a manda pa minister di Financia, a hay’e te na ultimo ora. Pa tal motibo ministerio di Financia a pidi  un plaso extra pa nan por  contesta nan carta.  Di e resultado di e reunion aki nan lo dicidi si nan lo sigui cu nan accion of no.  SADA ta para riba e punto cu no tin luga pa huurdonan di auto den e sala di aeropuerto. Den e reunion dialuna  nan a debati riba e puntonan di preocupacion cu SADA  a trece y asina evalua cual ta e decision final rond di henter asunto aki. Bon Dia Aruba no por a haya informacion di ultimo ora riba e resultado di e reunion aki.

Comision no a trata asunto di aeropuerto
Encuanto e comision cu a wordo lanta entre otro pa trata e asunto di  e situacion na aeropuerto, Presidente di e sindicato SADA Eduard Maduro ta bisa cu ta berdad, pero e comision aki a keda instala na comienso di 2014. Igualmente e sindicalista a indica cu lamentablemente e asunto aki no a wordo trata den e comision.

E director di duana tabata presidi e comision,  y den varios ocasion sr. Maduro mes a participa den e reunion di e comision aki, prome cu el a bira presidente di SADA. E ta bisa cu den varios ocasion nan a pidi e director di duana pa trata e situacion di aeropuerto; pero nunca el a haya un reunion pa atende esaki cu Triple A. Sr. Maduro ta splica cu te na ultimo momento ora cu tur cos tabata cla, e ora ey e directiva di Duana a bin papia di e mapanan, haci cambionan y te hasta aproba e mapa. “E ora ey nan a yama sindicato aden. Nunca nos tabata di acuerdo con e sindicato a wordo trata den e comision.”

E ta afirma  cu e parti di e trabou di e aeropuerto no a wordo trata den e comision cu presencia di SADA.  Awor cu director di aduana a aproba e mapa y cu e construccion a cuminsa, nan ta bin wak cu tin cos hopi robes riba e mapa aki, y awor nan kier sinta cu e comision. “Nos no ta kere cu esey ta e manera mas profesional y responsabel pa traha.”

For di parti di director di duana, Bon Dia Aruba no a logra di haya un comentario ainda.