Departamento di Aduana su seccion na aeropuerto ta hibando un control stricto riba tur producto cu ta bin di afo; entre nan remedinan. Ronny Croes kende ta encarga cu e seccion di Aduana na aeropuerto a bisa cu nan ta confronta frecuentemente e casonan di traficacion di remedi cu ta wordo transporta clandestino, entre nan steroid y remedi traha a base di cannabis.
Tin hendenan cu ta sconde nan den maleta; pero te hasta camufla den caha di pieza di auto. Personal di duana ta haya un variedad di producto cu tin cierto restriccion manera steroid y diferente otro cos. Sr. Croes a adverti cu e personanan cu ta purba haci algo asina ta core e risico di haya un multa. Den e caso aki nan ta haya fiscal y e ta esun cu ta pone e multa.
Tin hende cu ta purba di drenta cu cantidad di remedi sin niun receta di dokter. Mayoria di nan ta bini for di e paisnan bisiña, particularmente Colombia. Tambe di producto traha a base di cannabis pa uzo medicinal. Duana tin hopi di nan den deposito cu nan a confisca. Sr. Croes ta reconoce cu esaki ta un tarea di e minister concerni, ya cu na Aruba e ta prohibi pero den gran parti di mundo e producto aki traha cu cannabis ta wordo uza. “Oil di marihuana ta wordo uza como medicina, pero Aruba no ta cla ainda pa esey”, el a bisa.
Procedura
Encuanto e pashentnan cu ta bay afo pa busca nan salud y ta bin cu cantidad di remedi pa nan tratamento tin un procedura. E persona mester bay cu e receta aki na departamento di Inspeccion di Remedi pa nan por haya un aprobacion. Ta depende di e instancia aki kico ta e remedinan cu nan tin riba nan lista cu no mag y nan componente pa nan haya of no un carta di aprobacion.
Sr. Croes a laga sa cu den asunto di remedi ta algo delicado caminda tur persona mester trece tur su papelnan na ordo pa nan por wak e trayectorio cu berdaderamente nan a tuma tratamento na dokter. Riba e declaracion mester ta poni e cantidad di pildo cu e persona mag di uza y cuanto e tratamento ta bay dura. “E no ta cos cu el a cumpra den botica y trece pa nos”, el a bisa.
Duana ta traha den coordinacion cu departamento di Inspeccion di Remedi cu ta e instancia autorisa pa duna aprobacion finalmente. Si e persona tin declara riba receta di dokter tur su tratamento, Inspeccion di Remedi lo por duna aprobacion pa introduci e remedinan aki.
Tanten cu e papel di aprobacion no ta cla tur e remedinan ta keda den confiscacion. Sinembargo duana ta laga e persona pa bay cu un cierto cantidad pa e por sigui su tratamento te ora cu e ta bin cla pronto cu su aprobacion for di Inspeccion di Remedi.
