ORANJESTAD – Durante un conferencia di prensa, e mandatario Chris Romero a clarifica locual ta su competencia como minister di transporte publico.
Conforme cu ordenansa nacional, transporte publico ta transportacion di personanan di un punto pa otro punto a cambio di un pago, door di un vehiculo cu tin un permiso otorga door di minister encarga cu e cartera aki. Kiermen departamento di transporte publico tin responsabilidad solamente pa controla esunnan activo den transporte publico, banda di polis.
Tur otro tipo di plachi (pa ehempel tipo A) cu no tin di haber cu transporte publico, cu ta transporta persona sin tin permiso otorga pa e minister encarga cu transporte, ta haci e actividad aki ilegal.
Segun Romero, cuerpo policial ta e unico instancia oficial cu tin e autoridad pa actua contra e ilegalidad aki. Pues den poco palabra, e tipo di control aki no ta competencia di DTP.
Esun cu kier haci uzo di taxi pirata ta core e riesgo grandi pa su mesun siguridad, ya cu e taxi pirata no tin seguro pa e pasaheronan.
E mandatario a bisa cu diferente grupo di autobus y taxi a pidi pa reuni cune. Sinembargo, cada un di nan tin nan punto di bista cu ta contradeci otro den locual nan ta pidi.
E ta haya cu un solucion lo ta ora cu e plan di mobilidad ta bin cla. Ya cu unabes cu e por tin e datonan di nan tur, e ministerio aki por bin cu un solucion mas concreto pa medio di un plan integral pa atende cu e asunto aki.
