Segun minister di transporte publico, Chris Romero (MEP), mester bin cu un restructuracion den Departamento di Transporte Publico (DTP). Pa tal motibo el a bin cu un sondeo den DTP y tambe a nombra dos persona cu e ta considera cu tin suficiente experiencia pa reorganisa e departamento aki y pone opera manera debe ser.
El a nombra Sigfried ‘Tito’ Thiel y Bernardo Maduro den DTP. E ta convenci cu hunto cu nan e ta cera un bon ekipo cu lo bay restructura DTP pa brinda e servicio cu e departamento aki a wordo lanta. Nan lo trece alternativa pa baha e presion cu tin rond di transporte publico.
Sigfried ‘Tito’ Thiel ta un persona cu a yuda lanta e departamento aki. Sinembargo pa motibo politico e persona aki ‘wordo poni un banda’. E tabata den departamento di Aeronautica Civil cu ta cay tambe bou maneho di minister Romero tambe. E mandatario ta haya cu sr. Thiel ta un persona cu ta gosa di conocemento y respet na DTP. Ademas e mandatario ta considera cu sr. Thiel ta inspira confiansa cerca dje.
E di dos persona cu el apunta den DTP ta Bernardo Maduro kende ta un polis cu experiencia riba maneho di trafico y kende ta wak e problema den trafico diariamente y lo por trece solucionnan.
Moratorio di permiso
E moratorio pa no duna mas permiso pa taxi, esaki lo keda vigente, pero ta depende di e circunstancianan. Segun e mandatario e gobierno anterior na fin di su mandato a lanta e moratorio pa un dia so y nan a otorga 50 permiso nobo pa taxi y auto bus. E ta considera e permisonan aki ilegal y pa tal motibo el a pone un paro riba nan di biaha. Kiermen e permisonan aki no a wordo honra, mientras si e moratorio a wordo honra.
“E moratorio cu tabatin esey ta kico mi ta basa mi maneho aworaki na dje”, el a bisa. Sinembargo e no sa si lo mantene e moratorio aki pa futuro. E mandatario ta argumenta cu nan tin proyectonan na caminda cu casi sigur, ta bay exigi mas transporte. Pero esaki no kiermen cu e ta bay lanta gewoon e moratorio.
E mandatario no a referi na e proyectonan, pero si ora nan ta asina leu nan lo determina si mester otorga mas permiso of no pa transporte publico. E decision aki lo wordo tuma a base di investigacion y studionan, entre nan di departamento di Asunto Economico. “Si mester e ora nos ta bay haci esaki”, el a declara. Pero esaki lo wordo haci di un manera responsabel y no simplemente core lanta e moratorio sin mas.
Minister Romero a declara cu pa añanan largo tin problemanan grandi rond di nos isla ora ta trata di transporte publico. El a bisa cu for di añanan atras DTP ta conoce e cambio di directornan constantemente, y keto bay e departamento ta keda cu e mesun problemanan. E ta identifica mayoria di e problemanan como falta di comunicacion. Esaki a base di un sondeo cu el a realisa hunto cu su consehero. E falta di e comunicacion ta pone cu e trahadonan ta bira demotiva y sin gana di traha.
Situacion di DTP
Bon Dia Aruba a papia cu ex-minister di Transporte, Otmar Oduber (POR), kende a hiba e maneho den e departamento aki pa mas cu tres aña durante e gobierno anterior. E actual minister di Infrastructura a bisa cu e ta full di acuerdo cu su colega Romero cu e nombramento di sr. Thiel den DTP.
Minister Oduber a bisa cu e persona aki tabata esun cu den conseho di minister di e gobierno anterior el a presenta pa bira e director nobo di e departamento aki na aña 2016. E aña ey e mes a yega di propone sr. Thiel como candidato pa e funcion ey. Te hasta e tabata un decision di conseho di minister e tempo ey segun minister Oduber, pero lamentablemente a cambia e decision aki. Mientras cu a bin atrobe cu e mesun director ultimo cu ta bon amigo di ex-minister Mike de Meza.
E mandatario a bisa cu ora el a sali fei gobierno anterior di gabinete Mike Eman II, e ta compronde e desaster cu tabatin na DTP, ya cu ‘na momento cu mi persona no a asumi e responsabilidad mas, tur cos a cambia bek’.
E ta haya cu tur cos a bay atras, incluyendo tur e cambionan cu a bin despues, ya cu nan no a percura mas pa persigui e taxistanan pirata. El a bisa cu e fraccion di POR den parlamento tambe ta haci un esfuerso pa bin cu cambionan di ley pa duna e autorisacion necesario na e personal di DTP. Pero tambe cu nan por haya sosten di polis cu e tempo aya e no tabata haya di su ex-colega di husticia, Arthur Dowers. Polis ta esun cu ta autorisa y no personal di DTP pa para autonan priva tipo A. E tipo di plakkaat aki e taxistanan pirata ta uza, ya cu logicamente no tin taxi pirata cu permiso di gobierno.
Tambe el a cuestiona e echo cu riba un dia so e minister di e gobierno anterior cu a keda encarga cu e cartera di transporte publico a lanta e moratorio cu el a bin cu esaki. Tambe nan a duna un cantidad di diferente tipo di permiso nobo di transporte publico. Esaki a pone cu e situacion den DTP a bira mas desaster di loke tabatin, segun minister Oduber.
