ORANJESTAD – Pa locual ta e companianan Cala Romana y Caribbean Beton, por indica cu e companianan aki no a ricibi ‘hindervergunning’ pa haci trabou di cobamento na e area di Sero Cristal, director di Directie Infrastructuur en Planning (DIP) Jaime Croes ta informa.
Pais Aruba a yega na un acuerdo cu nan lo muda nan actividadnan y stop di causa daño y molester na esunnan cu ta biba den e cercania. Conforme declaracion di director di DIP, Jaime Croes. “E companianan aki ta trasladando nan actividadnan y nan no mag di coba mas.”
Locual ta tumando luga, y cual ta potretnan cu por a tuma nota di dje den medionan social ta, cu nan ta trasladando e santo pa e sitio na unda e companianan lo muda p’e, cu ta na Barcadera. Adicionalmente ta mandando team di Bureau City Inspectors (BCI) y DIP diariamente pa percura cu e companianan aki ta mantene nan mes na e palabracionnan haci. Hecho ta cu nan no tin hindervergunning pa opera den e area cu ta natuurgebied, Croes a conclui.
Ministerio ta manda un palabra di danki pa tur ciudadano cu ta monitor e situacion y informando pais Aruba.
