E ordenansa gubernamental cu a keda introduci recientemente riba Inspector di siguridad pa asina disminui e riesgo y peliger laboral, ta aplicabel den e refineria tambe.
Durante un aña y mey pa dos aña, trabou grandi lo tuma luga pa rehabilita e refineria na San Nicolas, caminda e parti di siguridad na pia di trabou ta hunga un rol importante. Director di DTI, Sr. Dominico Werleman a bisa cu e departamento aki tin autoridad pa realisa inspeccion di siguridad den e refineria tambe.
“Tur caminda unda tin hende ta traha, nos tin algo di bisa”, el a declara. Nan por drenta sin notifica e hendenan cu nan ta biniendo pa evalua con e situacion di siguridad laboral ta. “Esey ta e autoridad cu DTI tin”, Sr. Werleman a bisa categoricamente.
Sinembargo el a laga sa cu den e refineria tin makinaria mas specialisa. Esaki ta demanda hendenan of inspectornan mas specialisa den cierto ramonan di e trabou specifico di refineria. E ta calcula cu e refineria mes opera pa Citgo lo bay forma e hendenan ey, pero DTI lo bay monitor pa wak con esaki lo tuma luga.
Tambe el a laga sa cu nos tin hendenan local cu a yega di traha den e refineria den pasado y cu tin e conocemento. E echo cu refineria lo duna formacion pa nan trahadonan den areanan specialisa ta bira un oportunidad cu DTI por manda hendenan pa haya chens pa atende e tipo di training aki.
“Mi ta calcula cu nan lo bay haci uzo di nan. Mescos cu den e reapertura anterior nan a yama tur e personanan cu tin experiencia pa bin yuda. Mi ta kere cu esaki atrobe lo bay tuma luga”, asina Sr. Werleman a declara na Bon Dia Aruba.
Independisacion y tarifanan
Di otro banda director di DTI a bisa cu e pensamento di independisa e departamento aki a wordo wanta un rato. Sinembargo Sr. Werleman a declara cu nan ta evaluando e forma pa pone DTI traha mas optimal. E ta un pensamento cu ta existi di banda di gobierno y di DTI mes, pa asina ofrece nan servicio di un forma mas optimal posibel na comunidad.
Te aworaki e proceso di independisacion ta wanta un rato pa wak si DTI ta bay keda como un departamento di Gobierno, pero trahando un poco mas independiente. Te hasta ta existi e posibilidad di privatisa como un NV e servicionan cu nan ta ofrece of como un compania sui generis.
Tambe nan ta trahando riba algun sugerencia pa adapta e tarifanan a base di inflacion. Segun Sr. Werleman e tarifa cu nan ta maneha ta data for di 2004, pues tin mas cu 10 aña sin nan tarifanan ta wordo adapta. Ya caba nan a pidi gobierno pa aproba e adaptacion di e tarifanan cu DTI kier bin cu ne a base di e indice di inflacion.
E hisamento aki mas tanto ta riba trabounan cu personal di DTI ta realisando pero cu te awor nan no ta cobrando pe. Entre otro nan a bin cu un regla nobo cu tur liftnan mester wordo gekeur tur aña. E tarifa aki no ta stipula ainda, y DTI a manda proposicion pa gobierno. Den caso e proposicion aki ta wordo acepta, DTI lo tin mas entrada y tambe mas entrada lo drenta den caha di gobierno.
