Inspeccion DTI certificado inspeccion (1).JPG

– Ayera un grupo di 15 persona a ricibi nan certificado como inspector di grua door di CICB Crane Inspections & Certification Bureau. E curso aki di 5 dia a wordo organisa pa DTI den cuadro di implementacion di e ley riba tereno di siguridad laboral.

Director di DTI, Sr. Dominico Werleman a declara cu e paso aki ta uno hopi positivo mirando e cambionan cu ta biniendo riba e parti di siguridad. “E hendenan ta birando mas consciente tanto e dunado di trabou como e empleadonan mes tambe. Nan tin cu tuma di nan banda pa proteha nan mes tambe”, el a bisa na Bon Dia Aruba.

No solamente e trahadonan mester tin e pañanan y ekiponan adecua, sino e conocemento cu lo yuda e trahadonan sa cual ta e riesgonan mara na cierto trabou. Esaki ta yuda pa e trahadonan ta mas consciente y tuma mas precausion posibel.

Ofishinan y formacion

Segun Sr. Werleman e ley ta stipula cu tin 20 ofishi pa nan haya formacion y despues nan personal ta wordo reconoci como inspector di siguridad den nan area di trabou. Ya caba nan a cuminsa cu esun di inspector di siguridad, mientras cu ayera un grupo a ricibi nan respectivo certificado internacional como Inspector di Grua. Tambe nan tin e inspector di Asbest cu tin un par di aña cu ta andando caba. Sr. Werleman a bisa cu riba e parti di inspector di Asbest, DTI kier traha mas structuralmente cu ne. 

Tin varios ofishi cu ta regla den ley y cu mester wordo reconoci. Nan ta bay traha riba con nan lo por bin cu e formacion di e trahadonan aki, ya sea cu hendenan local mes of persona experto di afo. Ta e caso di e grupo di inspector di Grua cu a ricibi nan certificacion internacional ayera cu ta brinda nan no solamente e posibilidad di traha na Aruba, pero afo tambe. 

Implementacion y cambio di ley

Sr. Werleman a bisa cu nan ta trahando pa implementa e cambio aki riba tereno di siguridad y cada bes mas mehora cada paso cu nan ta duna. Sinembargo un limitacion cu DTI tin ta cu nan ta trahando cu un ley basta anticua, pero tog e ta funciona aunke limita.

Logicamente mester bin cu cambio pa e ley por traha optimalmente y saca e parti cu no ta traha mas; y bin cu cambionan pa mehor’e y implement’e lo mas posibel tambe.

“E ta un ley di aña 50 bin ariba, pero nos no a yega asina leu cu nos ta implement’e den su totalidad”, el a bisa. Actualmente DTI ta trahando pa asina implementa totalmente pa tur hende bira consciente riba e reglanan cu nan tin cu traha cu ne.

Certificado CICB

Di otro banda Ing. Audy Puyosa kende ta Training Manager di CICB a bisa cu nan tin 16 aña di experiencia relaciona cu trabou cu mashin pisa di hisamento manera grua, grua mobil, brasa articula, grua toren, grua brug, grua riba plataforma marino, etc. tanto den operacion como den inspeccion.

E tabata masha satisfecho di por a duna training pa e grupo di 15 inspector di grua, ya cu intencion tras di e training aki ta esun di “crea un cultura normativo”. Esaki kiermen cu e departamento di gobierno concerni (DTI) lo por evalua cu e trabou di inspeccion ta wordo haci cu criterio profesional basa den normanan nacional y internacional.