Hoofd van Dienst wnd. Richella Dorothal ta informa cu DTI ta bezig cu e parti di keuring y trahamento di cita pa loke ta resto di tres luna di 2022, esaki ta e parti esencial pues pa tin e Keuringskaart valido, pa por bin haci e cita pa e keuring tuma luga. Den cuadro cu esaki, DTI ta haci un peticion na comunidad pa esaki tuma lugar trempan, pasobra mayoria di biaha na fin di aña riba e ultimo dianan bo ta mira cu mayoria di hende ta bini pa paga nummerplaat, seguro ta vence, y keuringskaart tambe pareu.
“P’esey ta haci e peticion pa bin akinan pa haci afspraak di keuring na ora pa por haya fecha. Actualmente dentro di un siman bo tin fecha caba pa haci keuring, e ta un proceso cu ta bay basta lihe awor,” segun Sra. Dorothal.
Locual ta vehiculonan usa pa transporte publico, nan ta haya un chens mas prome y hasta por riba e dia mes, depende si tin luga den agenda. Ta duna prioridad tambe na e parti di transporte publico pa loke ta esaki.
Actualmente pa e aña aki tin un total di mas o menos 16,700 auto cu a haci cita pa keur, pero 4,000 mas o menos di esakinan cu no a presenta pa keuring. Tin cu ta tuma e fecha pero nan no ta yega DTI, esey ta haci cu bo tin un cantidad grandi cu no a yega nunca ni pa revisa e keuring pa wak den ki estado e auto ta. E otro parti ta esnan cu no a bin haci cita mes pa keuring, cual segun DTI ta un parti mas grandi. DTI cu KPA ta sinta varios biaha riba e parti di keuring y varios cos mas pa wak con ta evalua esaki y ta bezig pa wak pa sinta cu KPA un bes mas pa sigui riba dje.
“Ta haci peticion na pueblo di Aruba pa corda riba seguridad di nan auto, di nan mes y nan famia.”
E vehiculonan hasta si nan ta nobo tin biaha nan ta bin cu problemanan di fabrica, pero pa e parti ora ta tempo pa haci bo keuring, haci esaki na ora pa bo por tin bo documentonan na ordo.
Tambe pa ora tin controlnan di polis pa bo ta cumpliendo,” Sra. Dorothal ta expresa. Costo di keuring ta actualmente ta na 50 florin pa auto, y otro diferente trucknan cu ta cay den otro categoria di prijs.
