Ainda departamento DTI ta investigando  e factornan cu por a conduci cu diasabra ultimo e ciudadano conoci, Gerald Luidens a fayece electrocuta  na altura di Budget Car Rental na Camacuri. E departamento ta evalua si mester bin cu reglanan.

 E faltal accidente a sosode ora cu e tabata ehecutando un  trabou riba un  billboard, caminda pa un motibo of  otro sr. Luidens a wordo sorprendi pa un descarga electrico di 12 mil volt.

 Director di DTI, Dominico Werleman a declara  na Bon Dia Aruba cu e investigacion aki ta uno grandi y e lo tuma su tempo. Nan mester determina kico a conduci cu algo asina a sosode. “P’esey nos ta investigando mas profundo ainda”. Ya cu ainda nan no por asumi nada te ora cu nan tin algo mas cla. “Nos ta investigando, nos no sa kico a pasa.”

E ta haya cu e confiansa y e pura ta hunga un rol den e tipo di accidente na pia di trabou. P’esey nan ta investigando e diferente factornan pa bin cu e reglanan pa e compania cu ta traha cu instalacion di billboard y aviso pa evita cualkier riesgo of cu  nan ta bira  minimo pa futuro.

Investigacion
Dialuna mainta e matutino aki a bay inspecciona e sitio unda e tragedia aki a sosode;  y nos a bin topa cu personal di DTI  sacando potretnan y haciendo algun evaluacion.  Nan ta investigando diferente area entre nan e ekipo cu a wordo uza pa realisa e tipo di trabou aki; e proteccion cu e persona a uza of no uza pa e tipo di trabou aki; dicon e orario ey, etc.
Sr. Werleman a  bisa cu DTI su rol tin di haber cu e investigacion riba e parti tecnico y pa saca afo kico ta e factornan cu a conduci cu e accidente a tuma luga. Ademas bin cu medida di prevencion pa den futuro evita e tipo di accidente cerca esunnan cu ta traha den e sector aki.

El a laga sa cu esaki ta un rapport interno y e conclusion cu nan lo saca lo wordo comparti cu e empresanan directamente interesa y envolvi den e caso aki.  E ta haya cu e rapport aki ta importante no solamente pa determina kico por a sosode of conduci cu e victima a confronta e accidente  cu e  waya di  halto voltahe cu a dal’e. Asina nan lo determina ki medida di siguridad e persona cu ta realisa e tipo di trabou aki mester adopta pa preveni algo asina.  Segun director di DTI eventualmente un persona por a sobrevivi na un descarga di coriente pisa; pero e mester  tin e proteccion debido y specialisa diseña pa e tipo di coriente. Personal di Elmar ora cu ta traha den un situacion asina “ta mata e coriente, bo no por tuma risico”, el a indica.

DTI ta haciendo un trabou di control y a bin cu medida manera esun di Inspector  di Siguridad na pia di trabou pa evita of minimalisa e tipo di accidente laboral.  Sr. Werleman ta boga pa tur hende ta mas consciente riba siguridad  y tambe pa nan inverti den ekiponan di siguridad cu por protege nan mes na momento di un accidente.