Diabierna mainta clientenan di DTI cu a bay gekeur nan auto a keda para den rij largo. Nan mester warda a pesar cu e sistema nobo di cita a keda introduci.
Director di DTI, Sr. Dominico Werleman a bisa cu e sistema mes cu nan a introduci ta bon. Pero e problema cu nan ta confronta ta esun di falta di personal. El a splica cu DTI tin falta di personal no solamente den e parti di keur auto, pero den otro seccionnan tambe.
“Den e parti di keur di auto bo ta ripara di biaha si un persona ta cay afo”, el a bisa.
Debi cu nan tin cierto cantidad di afspraak pa dia ta depende di e cantidad di trahadonan cu nan tin disponibel e dia ey pa brinda e servicio eficientemente. Ya cu si un of dos trahado ta cay afo, e proceso di keur ta tranca y e rijs largo ta wordo forma.
Falta di personal y entrada
Sr. Werleman a bisa cu pa sigui brinda e servicio aki mester saca personal di otro seccion pa bin duna un man. Diabierna tabatin un persona so pa keur e autonan locual ta algo imposibel. Pero despues nan a pone dos pa tres persona di otro seccion pa bin yuda y sigui brinda e servicio.
Cada bes cu e situacion aki ta presenta nan ta purba di haya un solucion. Pero director di DTI ta haci un apelacion grandi na gobierno considerando e scarsedad di personal cu e departamento aki tin, y mirando cu e seccion di keur ta genera entrada pa bin cu mas personal pa ofrece e servicio eficientemente. E seccion aki hunto cu e esun di keur di coriente ta genera mas entrada na caha di gobierno pa medio di DTI.
Sr. Werleman ta kere cu e seccionnan aki por genera mas entrada den caso cu ta wordo poni mas personal disponibel cu nan tin mester. Asina nan por aumenta nan cantidad di afspraak cu nan por tuma y logicamente genera mas entrada. E ta sperando cu gobierno por scucha e peticion aki pa bin por lo menos cu dos of tres persona pa alivia no solamente e situacion interno di DTI, pero pa brinda un miho servicio pa nos comunidad cu ta keur nan auto pa nan por core safe riba caminda.
“Bo no por tuma afspraak, anto e persona ta yega anto bo ta bisa: Sorry mi no por keur bo auto awe bolbe mañan”, el a bisa. Segun director di DTI, como departamento bo tin cu haci lo posibel pa bo sigui brinda e servicio, y no straf e cliente cu no tin culpa.
