E lamentablemente suceso caminda e conocido ciudadano, Gerald Luidens di 51 aña a fayece na consecuencia di un descarga electrico a conmove henter nos comunidad. Expresion di convivencia y solidaridad cu e dolor cu e famia di e fayecido ta pasando aden ta wordo expresa den social media.
Ferdinand Ponson di Brandweer ta conta nos cu nan tabata esun encarga pa baha e curpa pero e onderzoek lo mester wordo haci door di DTI. Ponson: “E problema tabata e coriente riba e machine. Nos mester a zorg pa kita tur coriente prome cu cuminsa cu e trabao pa esaki bay mas safe cu ta posibel.” Bon Dia a tuma contacto cu director di Dienst Technische Inspectie (DTI) Dominico Werleman kende ta bisa cu no tin mucho detayes ainda riba e caso aki. Mañan nan lo tin un reunion trempan riba esaki pa investiga entre otro kico por a bay robes.
Di loke nos redaccion a compronde, el a mishi cu cable di halto tension cu tabata colga cerca di e baki cu e tabata uza pa yega na parti halto di e billboard. Ta bisa cu e cable aki ta di 1400 volt pero esaki no ta confirma.
E ta un caso masha tristo, ya cu diahuebs ultimo Gerald a celebra cu su dos yiu a slaag y nan tabata den e preparacion pa bay Hulanda hunto cu su casa, Sanju Luidens di ATA, pa aloca nan. Pero igualmente e lamentabel accidente aki a sosode na bispo di celebracion di Dia di Tata cu ta un golpi duro pa su famia, particularmente pa su yiunan. Ainda tin preguntanan rond di e caso aki cu ta prematuro pa haya algun contesta oficial. Geralds a fayece diasabra ultimo algo pasa di 6’or atardi ora cu el a wordo sorprendi pa un descarga electrico na momento cu e tabata realisando un trabou di un aviso na altura di Budget Car Rental na Camacuri. E tabata doño di e compania Fast Signs y e ta un persona cu hopi experiencia riba e tipo di trabou aki.
Tur cos ta indica cu e tabata operando un manlift ora cu accidentalmente su cabes a dal un waya di halto voltahe, loke a ocasiona cu el a fayece electrocuta. Tin version cu ta indica cu e biento fuerte di e dianan aki por a hunga un rol den e fatal accidente aki. Pues ainda ta prematuro pa bisa si e persona a realisa e trabou aki sin e debido proteccion di siguridad; of determina cual factor por a hunga un rol pa e por dal su cabes cu e waya di halto voltahe ey.
