ORANJESTAD – Dienst Technische Inspecties (DTI), den luna di januari y februari di 2019 a haci un analisis di e trucknan di cuminda (‘Food trucks’) na Aruba, pa mira si nan ta cumpli cu DTI su rekisitonan y cu e ley.

Durante un entrevista cu Bon Dia Aruba, sr. Anko Koopmans, hefe di servicio di Dienst Technische Inspecties (DTI), a splica cu e departamento a haci un investigacion pa nan por haya un idea di con bon of con malo cierto situacionnan ta, pa nan por traha den direccion unda e departamento mester bay.

Koopmans a comenta cu e departamento ta wak specialmente riba e instalacion di gas, instalacion di coriente, inspeccion di vehiculo si ta un truck cu ta core riba caminda publico, condicionnan di e luga, si e food truck tin brandblusser y EHBO kit. E trucknan aki por ta mobil aanhangwagens, stationaire aanhangwagens, mobil truck, stationaire truck, hasta container y luganan vast.

E proceso ta consisti cu DTI a bay, den e caso aki, e food truck, pa puntra con nan ta traha cu gas, pa motibo cu nan ta cushina riba gas, un elemento peligroso cu si tin candela acumula of si no ta bon instala, por crea un candela grandi y lo por ocasiona un accidente.

E investigacion a ser aplica na 40 trucknan di varios districto. Mayoria di e luganan ta habri den oranan di anochi y no ta habri tur anochi den siman. E resultado ta cu na e momento aki, solamente un di e food trucknan tin tur punto na ordo. 50% no tin un instalacion di gas gekeurd, 92% no tin un instalacion di coriente gekeurd. 75% no tin un ‘geldig voertuig keuring’ haci, aunke esey ta conta solamente pa esun cu ta core riba caminda publico.

Di 75 pa 90% di e food truck tin puntonan cu mester drecha, cu ta e siguridad di e luga di traha, brandblussers of EHBO kit.

Tambe Koopmans a bisa cu DTI a haci entrega di varios documento, entre nan e controle brief pa e doñonan y asina duna e motibo cu nan ta fout y kico nan mester drecha.

Koopmans a bisa cu e siguiente investigacion, cual lo wordo haci den e proximo tres luna, lo ta mas severo y nan lo bay haci hunto cu Departamento di Salud, pa wak e carchi di salud di e trahadonan cu ta prepara e cuminda, y e manera con ta prepara e cuminda.

Koopmans a splica cu e doñonan di e food truck mester compronde cu no ta solamente placa nan ta traha of inverti den nan ekiponan, pero tin reglanan cu mester cumpli, no solamente pa e doño di e trabou, sino tambe ta aplica pa e trahadonan cu ta traha den dje, y pa e cliente cu ta cumpra e cuminda. “Si algo bay malo y e doño ta haya daño y perhuicio riba e cliente mes, e nomber di su compania ta bay abou” Koopmans a manifesta.

Di mesun manera, Koopmans a comenta cu DTI ta purba di haci un campaña di conscientisacion di e doñonan di food truck pa cuminsa tuma responsabilidad pa nan mes, su empleado y cliente.

Tambe el a duna di conoce cu Dienst Technische Inspecties ta enfoca mas den e parti di siguridad di e trabou of siguridad di empleadonan, pero manera Koopmans a señala, nan ta traha hunto cu departamento di Bombero, Departamento di Salud Publico y Inspectie Volksgezondheid Aruba, pa nan purba di ofrece e servicio mas miho con ta posibel cu ta pa e siguridad di cada tienda of negoshi na Aruba.

Koopmans a expresa cu nan tin prepara varios proyecto den lunanan aki, entre nan e seguronan di auto. Nan lo bay haci otro investigacion cu otro sorto di negoshi, por ehempel, pest control, laundry, luganan di corta cabey, cu tin e parti cu nan mester corda cu tin siguridad pa tene cuenta cu ’e.

Tur e negoshinan ey segun Koopmas a referi tin su risiconan di trabou y esey e doñonan di trabou mester cuminsa wak pa siña su hendenan pa tin cuidao pa no haci algo fout. Na final, ta e trahado cu ta haya problema y tin chens cu te e trahado ta bay corte contra e persona cu ta su doño di trabou pa e keha y esey el a splica cu nan ta preveni.